細漢个見笑代

提起我做囡仔个見笑代，彼是講會了袂盡。ing2過家治見若想著，閣會一个儂佇遐歹勢面轉紅(tng2-ang5)，抑 tann1 我都強卜變成厚皮甕(ang3)，銃子扑袂 thang3，著來罔寫--一半項(hang0)。

我對漢字佮書法个興趣扑算是命底登戴 (mia7-te2-ting1-tai3) 个。國小一(it4)年，偶拄然 (ngo2-tu2-jian5) 予我看著學校一个外省老師，散學 (suann3-oh8) 以後開班塊教毛筆，伊佇教室外口个大水槽頂，囥一塊青漆底、白線扑格仔个大塊亞鉛phiann2，一陣比我卡大漢个囡仔圍塊看，伊手揭(giah8)大支毛筆，搵幾下仔黃色料，吊手哪寫哪解說。我 chinn5-ua2 去一下看， sannh4 著，嘛想卜去學。無胚 (bo5-phue1) 迄个老師毋准，伊个意思是講，一年仔傷細漢，袂使；愛三年=个以上才會使來學。

好 noh4，毋予我學，我著家治踮厝內拚勢練。經過情形，即陣先免詳細講。Cit8-huann2 到小三，我才有凍去伊遐學寫大字。講 tioh8 都亦真怨歎，我入去才知影，迄內底有一寡峘年个學姐，姻是一年仔著開始來學矣，是按怎我即个好學生，遮爾有興趣，主動講卜來學，伊顛倒卜來 khiau5苦--我咧？我一直感覺伊卡疼查某囡仔，加減仔損斷 (sng2-tng7) 著我幼芷 (iu3-cinn2) 个心靈。

總是，我猶原下(he7)性命寫，寫甲金光萬道、瑞氣千條。無外久，我著會凍佮儂做伙出去參加比賽矣。上 hiau1-pai1 个榮譽，著是得著南部七縣市中年級書法冠軍。

迄擺是對屏東坐火車去到台南比。佇台南个時，共伴 (kang7-phuann7) 有一个六年个學姐，真照顧我，佇路裡攏會伸手共我牽咧行。比賽了轉來，一儂一路。檢采是迄个學姐畢業去讀國中矣，所以無閣來書法班。抑我即个干礁有一个逐工冤家个阿兄个囡仔疕(phi2)，煞 it4 著穿學生裙个姐姐牽我个手，哪行哪講話，迄種我透世儂毋捌有个幸福感，想卜閣見--伊--一--面。

聽著儂講姻兜遰佇竹巷口（阮遐个小地號），彼離阮厝無外遠，我著走去姻厝門口路邊 tham1--看昧。迄間厝我晉前捌綴大儂去過，看 tioh8 親像普通人家个販厝，毋閣有一个童乩服事 (hok8-sai7) 私佛仔 (su1-put8-a2) 塊予儂問代誌，咁講即个童乩著是姻爸爸？咁講儂共我報毋著所在，抑是我家治聽 tann7--去？

一遍閣一遍，我暗靜(am3-cinn7)走去遐，徛佇外口 niau1-niau1相(siong3)。即陣想起來，袂輸迄間厝攏放空營，毋捌有儂佇內底，至少，對外面相入去是按呢。我嘛毋捌有勇氣踏入去迄个神祕个所在開聲問－－我著按怎共儂講我來卜創啥咧？國小三四年仔个我，咁有想著講，若誠(ciann5)實閣再見 (kinn3)--著伊，紲落去卜按怎咧？

無，我啥麼攏無想。只是想卜閣見--伊。

一tau2 閣一tau2 个失望，終其尾，我滿腹个思慕 (su1-boo7)，嘛親像我儕儕 koh4-iunn7 个思想(su1-siunn2) 共款，一 sun5 一 sun5 消蝕 (siau1-sih8)--去。

即个姐姐我無閣眩(hin5)--伊，毋閣，出世來做儂一種無 tai7-ua5 个感受敢哪又閣卡重矣。