hau1-siau5

講無實在个膨風話騙儂，號做 hau1-siau5。先講 hau1--字，這寫做「詨」，是正字，意思著是誇口、講大話。目今儂儂知影 hau1-siau5 即个詞，煞毋知影「詨」(hau1)會使單獨用，像「講話真詨」、「汝毋通傷詨」。加一个 siau5--字，主要个意思共款，毋閣聽起來著變粗魯話。阮細漢攏毋捌 siau5 到底是啥，干礁知影袂使講著即个音，卜講嘛千萬毋通予大儂聽著，無，穩當會hong5 嚷(jiang2)，無hong5 搧嘴phue2，彼是真 kai1-cai3。

讀者咁捌看過一篇文，講一陣猴山仔 hong5 關佇籠仔內，實驗者佇籠仔頂吊一條芎蕉，第一隻猴伸手去提，自動設備感應著，著噴水出來共所有个猴仔濺(cuann7)甲七覆八笑(chit4-phak4-peh4-chio3)，第二隻、第三隻……去提，攏按呢，後來著無猴敢閣去提。實驗者閣掠一隻新猴入去，換一隻舊猴出來。新猴看著芎蕉，想卜去提，即時予留佇籠仔內个舊猴 mau1。最後，歸籠仔个猴攏 thui3--過，而且噴水器嘛關起來矣，益是無猴敢去提芎蕉，閣有拄入來个猴卜去提，舊猴共款共 tiap8，卻無猴知影是按怎袂使得提迄條芎蕉來食个因端(tuann1)。阮做囡仔，塊使用語言嘛是按呢。

大漢研究台語以後，才知 siau5 本義是「男性个精水」。咱个社會，凡若「歹聽話」，牽連著个事物，歸納起來有兩大類：性佮死。性个器官、行為、排sia3物一律攏是禁忌(kim3-khi7)，予汝袂講、袂想--得。查甫儂講歹嘴，用「性」个歹聽話卡ciap8；抑若查某儂，著用「死」个話卡儕。這干礙著女性佇「性」个方面是徛佇弱勢。凡勢後日我會寫寡論文繼續來究勘(kiu3-kham3)即方面。

本來是中性个字、詞，添一个歹聽个字眼起去，大意無變，口氣加強，風格變粗野，這是台語構詞法(koo3-su5-huat4)一个大項目。以 siau5 為例：

「詨」：講膨風話騙儂。變「詨 siau5」。
ge5：討厭、袂爽。變 ge5-siau5。
chap4：瞅睬 (chiu3-chai2)、【理睬】。變 chap4-siau5。
衰(sue1)：歹運。變「衰 siau5」。
孽(giat8)：囡仔 cih4-cuh4、phok4-khiat4、【調皮】。變「孽 siau5」。
……

有 siau5 个詞，驚死儂儕，無一百條，嘛有五十條。表現方式嘛毋但頂峘即種耳。有機會才閣講。

siau5 个漢字按怎寫？文獻有用「精」--字來訓讀，也有用「韶」--字來借音，攏無妥當，我攏無愛用。後來有一寡台語本字派，講 hau1-siau5 本字著是「虛詞」，透底是足雅氣个話。這在我看來，有卡 hau1-siau5--tiap8--a2。

即幾年，社會愈開放，少年儂愈無禁無忌，查甫查某啥麼話都敢講。姻佇網路、BBS、IM 頂頭塊 kiat4-uang1-kiat4-tong2、牽翁仔補雨傘，三不五時愛用台語个粗話來表現姻个漂撇khui3，逐家蓋愛寫做「濠洨」，彼是用北仔話音來做聯想，「洨」台語讀做 haunn5，毋是 siau5。「濠(ho5)」是護城河，「洨(haunn5)」是溪名、縣名。

hau1-siau5 閣再加強氣口，變四字詞，像「詨哩詨siau5 (hau1-li2-hau1-siau5)、「詨siau5詨篤 (hau1-siau5-hau1-tak4)。

單獨一字講「詨」，卜加一字來ciann5做兩字詞，咁一定愛講 siau5？斷斷(tuan3)毋是！有一个強卜失傳个詞：「詨六」(hau1-lak8)，「講話詨六」、「伊塊講詨六，勿共 sin3-tau2」。這是中性詞，毋是歹聽話。即點予咱看著台語絕種(ceh8-cing2)个一種演變模式：中性詞袂曉講，干那會曉講卡粗个。有情有義个儂會跳講，hau1-siau5 毋是粗魯話；抑無血無目屎个新台灣人(jin5)著講，【你們這些台客講的話，我聽不懂、不想懂、沒興趣學】。

「詨六」加強語氣，變四字詞：「詨哩詨六 (hau1-li2-hau1-lak8)」、「詨六詨篤 (hau1-lak8-hau1-tak4)」、「詨么詨六 (hau1-io1-hau1-lak8)」、「詨六八級 (hau1-lak8-peh4-kip4)」。汝看有外儕通用，咱攏袂曉講矣！

我寫即篇，有根有據，毋是詨siau5 講歸擔(tann3)，嘛毋是塊「詨唐無影跡宋」(hau1-tong5 bo5-iann2-ciah4-song3)。

補充：2012-08-28 我有閣寫一篇〈再論 hau-siâu（嘐潲）〉，請進一步參考。