「經緯」个台語正音是「經偉」？

本文

有以前个學生咧問台語朗讀稿「成大經緯社」个「經緯」按怎唸？Tann 共我个答覆完整寫佇下底：

「經緯」台語正音是 king-huī，「緯」第七聲，有聲母 h，佮「惠」仝音。

「經緯」俗音是 king-uí，佮「經偉」仝音，這是將「緯」誤做是「偉」个仝音字（其實即兩字無仝聲調），所以氣象報告攏唸做「北緯 pak-uí」，照正音是「北緯 pak-huī」，英廈辭典(1883) p.270 就是按呢唸；台日大辭典(1932)也有收即个詞，伊「北」唸文言音：pok-huī。

即个問題真歹剃頭，我毋知汝若唸 king-huī 會拄著毋捌傳統、毋捌正音个評審，顛倒共汝扣分--袂。但是若唸 king-uí 仝款有可能拄著堅持正音个評審共汝扣分。

教台典「緯」字孤收一音 uī，我扑算伊這是照中古音韻書「于貴切」生出來个擬音，掠來當做台語正音。無論漳、泉、廈个傳統韻書字典，「緯」字攏是 h 聲母个去聲字，台灣白話字文獻，像《三字經新撰白話註解》，「緯」字也是唸 huī。阮个漢文老師漳州莊先生咧唸也有 h 聲母。只有《彙音寶鑑》「緯」唸 uī，教台典佮伊仝款。

「經緯」另外有白話音个唸法 kinn-huī / kenn-huī，織布機个直線就是「經線 kinn/kenn-suànn」，「經」唸白話音；橫線就是「緯線 huī-suànn」。若是地球个「經線」、「緯線」，是唸 king-suànn、huī-suànn，「經」唸文言音。

英廈辭典(1883)「緯」字照閩台語正音唸 huī

補充：以前長老教會佇中部，有一位真出名个醫師兼牧師「謝緯」先生(1916-1970)，是第二屆醫療奉獻獎得主。白話字教會公報提起伊个時，若毋是寫做 Siā Hūi（伊自稱也是按呢寫），無，就寫做 Chiā Hūi，也就是爭差姓「謝」有兩種講法，但是伊个名「緯」--字，教會公報毋捌寫做其他 úi 抑是 uī 个音。

---

面冊網誌留言

蕭平治
較早阮崁頂庄keⁿ楊麻布(黃麻布)tsiâⁿ出名，阮攏講經線keⁿ-á，緯線húi-á。

潘科元
補充：若是地球个「經線」，唸 king-suànn。

Tiunn Siok-tsing
我以早蹛過紗廠佮織布廠,in攏講 經紗(king-se) 緯紗(ui7-se).

潘科元
補充：以前長老教會佇中部，有一位真出名个醫師兼牧師「謝緯」先生(1916-1970)，是第二屆醫療奉獻獎得主。白話字教會公報提起伊个時，若毋是寫做 Siā Hūi（伊自稱也是按呢寫），無，就寫做 Chiā Hūi，也就是爭差姓「謝」有兩種講法，但是伊个名「緯」--字，教會公報毋捌寫做其他 úi 抑是 uī 个音。

（ 陳憲緯 罔參考）

陳憲緯
多謝潘老師！

Chongle Chhua
彼个提《被出賣的台灣》擲馬英九的顏銘緯，知影伊的名ài 讀Gân Bîng-huī. 無簡單neh，20捅歲仔讀中山大學。

Chongle Chhua
閣有一字「銓」，台南市民進黨籍市議員蔡百「銓」，毋知伊本人按怎讀？

HC LI
阮是彰化和美人，細漢的時，阮小妹去庄裡的織布工場紡紗仔，叫就「做緯仔」cho3-hui2-a2，緯的讀音佮平治兄讀--的共款。

李碧峰
無毋著，咱和美lian2-se7工廠蓋濟，阮嘉寶潭以早嘛足濟人做撚紗廠的，in攏講tso3-hui2-a2，khioh2-hui2-a2

Roger Ông
緯 上古音　有 hㄏ 聲母
《廣韻》《集韻》《韻會》于(u5)貴(kui3)切《正韻》于(u5)位( ui7) 切，𠀤音胃(ui7)。《說文》織橫絲也。
又《集韻》羽(u6)鬼(kui2)切，音偉(ui6)。《博雅》束也。《夏小正》農緯(ui6)厥耒。
http://dic.taigubun.org/search.php?w=%E7%B7%AF
緯 - Web 台語漢文輔助系統

又《韻補》叶呼(hoo1)韋(ui5)切(hui1)。《劉向·九歎》慶忌囚于阱室兮，陳不占戰而赴圍(ui5)。破伯牙之號鐘兮，挾人箏而彈緯(hui1)。

梁之明
詹瑋傑 緯解使讀做h

曾民華
經緯早前綴人唸ui2 自覺 參綱維ui5混淆 乃以正韻為準 正韻 于位切 是ui7 廣韻 ui3于貴