「網」台語白話音 bāng 第七聲，親像魚網[hî-bāng]、網魚[bāng-hî]、補破網[póo phuà-bāng]。
「網」台語文言音 bóng 第二聲，親像「天網恢恢，疏而不漏」[thian-bóng khue-khue，soo jî put-lōo/liō]。
佇即个電腦通訊[sìn]極發達个新時代，蓋濟儂「網路 bāng-lōo」个台語講袂準，講做「蠓路 báng-lōo」，我見擺聽著，面頭前著出現一大陣蠓仔[báng-á]，烏黔黔[oo-khâm-khâm]，onn-onn叫，飛做一路。
「網站 bāng-tsām」怹袂曉講，講做 báng-tsām。扑算是車頭起好，無咧用，囥咧飼蠓[báng]，所以叫做「蠓站」。^_^
嚴格講起來，走音唸做 báng-lōo，並毋是白話音予文言音个聲調影響去，其實遮个講 báng-lōo 个儂，怹並毋知影「網」有 bóng 个音，叫伊單獨講「網」即字个台語，怹嘛一定攏會講 bāng。
會講做 báng-lōo，是華語調類佮台語調類對應个規律咧影響。除了入聲字以外，大部份華語个上聲（華語上聲是第三聲），台語嘛唸上聲[sióng-siann]（台語上聲是第二聲），親像「海、比、彩、水、手……」，但是有少數个例外，親像「雨hōo、網bāng…」即寡字个台語白話音是陽去⋯⋯聲（第七聲），毋是上聲，怹不知不覺，進行「錯誤類推」个結果，將台語「網路」第七聲个「網」嘛當做是第二聲(上聲)咧處理，所以會唸做「網路 báng-lōo」。
一般儂並無具備「有意識--著，分析解說會出來个語言規律个智識」（所以蓋濟儂會講出「中文無文法」即種可笑个見解），但是怹猶原會凍佇無意識中，學會曉出世著咧講个語言歸套个規則，怹嘛佇不知不覺當中，掌握著真濟華語佮台語个對應規則。只是因為這是佇「不知不覺」當中進行个，所以定定會過頭 套用遮个規則對例外个情形去，按呢三不五時著會hut毋著去。
咱對外儂卡歹勢共糾正伊个錯誤，但是後回汝若聽著熟似儂咧講 báng-lōo。伊會使按呢共伊提醒：請問，【魚網】欲按怎講？伊會應講 hî-bāng。汝閣問伊講：【魚網 網魚】按怎講？伊會講 hî-bāng bāng-hî。汝閣問伊，【網魚】是 bāng-hî，按呢【網路】咧？伊頭殼若轉袂過來，閣共汝應講 báng-lōo，汝著喙哪講，手哪比，講：既然是講 bāng-hî（講第一字个時，雙手手面，揤[tshi̍h]向塗跤，表示是真低个聲調），是按怎會變做 báng-lōo（講第一字个時，手比峘峘）
當然「網魚」佮「網路」結構無共款（一个是動詞+名詞，一个兩字攏是名詞），但是我一時想無其他佮「網路」結構共款个「網〇」个詞，而且怹閣一定唸會準个話 來提醒怹。
---
另外，「院長 īnn-tiúnn」蓋濟儂唸做 ìnn-tiúnn，即个現象佮頂面無共款。這是因為泉州腔去聲本調無分陰陽，變調照講是有分。但是有寡字佇變調个所在，嘛煞陰去、陽去攏變共款去。所以陽去聲个「院」，變調唸做佮陰去聲个變調共款，是按呢个關係。
問題是泉腔又閣濫著漳腔，變成真濟儂「病院」講 pīnn-īnn；「院長」煞講 ìnn-tiúnn 即種系統無一致个情形。
總是，「院長」唸做 ìnn-tiúnn 成做台灣泉腔个「特色」，毋知傳幾代，存在足久矣。即種个，咱毋通共伊掠包，當做漳泉融合了無夠規律个現象著好。親像「代表 tāi-piáu」講做 tài-piáu 嘛是共款情形。這攏無要緊矣啦。
另外一个詞「附近 hū-kīn」講做 hù-kīn。這有可能佮「院長、代表」共情形，亦有可能是受華語个影響。台語兩種去聲，華語干那一種，台語去聲內底个陰去第三聲變調以後，著佮華語去聲个調形共款攏是高降調。Hū-kīn 唸做 hù-kīn 真成華語音。
總是「網路、網站」是新詞，而且唸做 báng-tsām / báng-lōo 是照我頂面所講，對華、台語个調類對應來錯誤類推个結果，這蓋毋好，咱著愛趁伊猶未惡化以前，想辦法牽挽轉來。
2013-08-18 補記：許嘉勇老師講，怹鹿港真濟老儂講「hu53-近」，按呢我先將 hù-kūn/kīn 即種講法當做是泉腔个特色。
另外，新詞「負面、負數」建議比照舊詞「負責 hū-tsik、負擔 hū-tam、負債 hū-tsè」唸做 hū-bīn、hū-sòo，請毋通唸做 hù-bīn、hù-sòo，佮「付面、付數」變仝音字去。
Comments powered by Disqus.