老子[Nóo-tsú]道德經內底有兩句極出名个話：「天地不仁，以萬物為芻狗；聖人不仁，以百姓為芻狗」[Thian-tē put jîn, í bān-bu̍t uî tsoo-kóo; sìng-jîng put jîn, í pi̍k-sìng uî tsoo-kóo.] 道家正統派个解說，是講，天地無偏私、無偏愛，亦袂家婆、好[hònn]tshióng事[sū]，自然無為，予萬物家治去生長、死亡。這佮儒家講个「天地之大德曰生」[Thian-tē tsi tāi-tik ua̍t sing.]，雖然觀點相反，但是相反相成。
總是若拄著天災地變，親像即遍个八八水災按呢，著會予儂對「天地不仁」即四字，產生另外一款感受。
毋閣我即篇短文真正个重點是欲針對「聖人不仁，以萬物為芻狗」即句話，徛佇民主時代个觀點來共伊換講法，咱愛講「人民不仁，以領袖[líng-siū]為芻狗」。「芻狗」是古早儂塊拜拜个時，縛草仔做狗仔形个偶像[ngóo-siōng]，代替真正个狗來做牲禮，袂輸咱即馬个麵豬、麵雞to̍h著。（中國南方卡愛食狗肉，有儂講道德經是楚國个作品，有舉冊裡袂少楚方言做證，我感覺「芻狗」嘛算是一條例證）
下面用麵豬來解說，卡好理解。咱用虔誠个心，將新鮮个麵豬提上翁架桌頂[ang-kè-toh-tíng]來拜神明，真好。毋閣，麵豬囥兩點鐘無要緊，抑若囥兩工咧，犯勢仔著開始變質、臭tsiat去矣。按呢欲按怎？當然愛趕緊共彼麵豬提落來，擲[tàn]hìnn-sak，換新个、鮮[tshinn]个、好个來閣拜。
民主時代，咱將一个形象清新、少年肯拚个人物扛上台頂做頭儂，做一下久，伊tsuan9開始塊腐化啦，按呢欲按怎？趕緊共偃[ián]落來，換好--个起去著是。
無論帝王時代，抑是民主時代，咱攏需要領導者，這是過去五千年佮未來五千年，扑算攏袂變个人類社會个行為模式。但是行到民主時代，咱人民愛做主、做大，將「尊君」个思想，合宜共理解做講－－咱是尊敬、疼痛[thiànn-thàng]、順趁[sūn-thàn]「君」即个「角色」，毋是尊敬現時塊扮演迄个角色个某乜儂。 一旦迄个某乜儂个行踏[kiânn-ta̍h]，已經無合[ha̍h]佇「君」即个角色个條件佮要求，按呢咱愛隨時共lut掉、thuì新个起去。
這著是「人民不仁，以領袖為芻狗」。過去有功勞个，咱感念伊；總是勿將咱目今佮後日个幸福，寄託蹛任何某乜儂个身--上。伊會來腐化[hú-huà]、敗壞[pāi-huāi]，這嘛是自然个變化，所以亦免感慨[kám-khài]、lok志。
Comments powered by Disqus.