《與馬英九論台灣史》

（6/12 修改上尾段）《與馬英九論台灣史》李筱峰著，林佳怡協同撰述，玉山社出版。李筱峰(li2-siau2-hong1)出名儂，毋免加介紹。我佮伊毋捌有 ti7-tai7，毋閣有一項代誌，佇遮講恁知。我佇政大讀到大四，才落手研究台語，迄陣定定去圖書館、社會科學資料中心揣資料，無張持(tiunn1-ti5)發現一本卡早个校長个記事簿，頂峘簡單寫講伊迄日開會，決定將李筱峰退學。李筱峰即个事件，google一下著知，彼是 1974 年个代誌。即位校長嘛姓李，伊 1977 年升做教育部長，歸尾做到第八屆中華民國副總統，徛算是中國古早儂講个「位極人臣」(ui7 kik8 jin5-sin5)。

接李校長=个是歐陽校長，做不止久，我入政大，伊閣佇咧。迄陣我毋捌世事，袂凍理解是按怎每一个系，除了有學會，閣攏有設一个國民黨佇系裡个學生黨員所組成个啥麼聯誼會來配合，姻閣攏會chap4著全系个代誌，定定佮學會合辦活動。我真白目，煞佇系學會開大會个時，徛起來批評即種現象。檢采是姻看出出，知影我肚臍屎抑未落(lak4)，講遐个話是塊蠓仔叮牛角，教官小共我關心一下，著煞去矣。

閣來是陳治世校長。陳校長態度閣卡保守，一上台著開座談會，講歸晡，意思是叫阮認路讀冊，勿 pinn3社團、chap4政治、舞豬舞狗，聽tioh8予儂足倒彈(to3-tuann7)。

後來我閣佮國民黨个黨工起kau2-keh8，總是，彼攏是sap-a2代，有閒才閣講。

紲(sua3)落來卜講協同(hiap8-tong5)撰述者(cuan7-sut8-cia2)林佳怡。我本底是完全毋知伊，tu2-chhian1前幾日仔佮師大台文所研一个學生佇MSN開講，問伊班裡是毋是閣有儂台語程度嘛真好个，伊講有一个台大中文系畢業个，閣會曉唱歌仔戲。我看著冊皮內底个介紹，才想著應該著是伊。介紹是按呢：

『林佳怡　1978 年生，台北縣人，台大中文系畢，現就讀於國立師範大學台灣文化暨語言文學研究所。曾任教育部閩南語常用詞詞典編輯，接觸多位學養深厚的前輩及珍貴語料。長年以來對於台灣研究各領域都具有濃厚的興趣，廣泛涉獵歌仔戲以及台灣語文、歷史、民俗的相關知識，試圖在生活中尋找台灣語言的深層文化底蘊。』

這段文字敢(kann2)是伊个自我紹介，感心，值得我看樣。儂个眼光遮爾闊大，抑我煞攏干那會曉注意語言本身耳(nia5)，閣將古早台灣百姓个語言當做古典文學來打扮。想講台灣天毋知變過幾遍矣，迄種用台灣話來當做完整个社會語言个時代已經變成歷史研究个材料，一切攏去了了矣，過去=个無可能閣興，未來久久久，斷斷(tuan3-tuan3)是台灣北仔話个天年。「北仔話」个名稱是我即个無名小卒體號(the2-ho7)个，卜講卡妥當个名稱檢采著愛按照我所欽服(khim1-hok8)个一位語言學家講過个，共叫做是「新台灣話」。伊是佇一擺筵席(ian5-siah8)个時按呢講，我看同桌(tang5-toh4)有一位半世儂奉獻予台語个研究者聽了後个面chiunn1，無ka3-la7同意个款。

主觀感情袂凍同意，恐驚即个「新台灣話」全然(cng5-jian5)是客觀事實个稱呼。卻(khiok4)是，即陣講起即條古，煞予我一直想著後來馬英九所提倡个「新台灣人」。想甲真，「台灣儂」本底咁毋是干那塊講遰佇南部海邊一搭个社裡儂，後來變成是全島「本島儂」个稱呼？目今即lo7範勢(pan7-se3)，「新台灣人」是卜當做台灣地有勢儂个代名詞 iah8-ku2-kann2。「新台灣人」个「人」--字，我建議愛讀做 jin5，按呢卡有字眼(ji7-gan2)。XD

有 sin1-tai5-uan5-jin5，自然tik8，愛有「新台灣史」來配，毋才會鬥搭，汝講是毋是咧？果必然(ko2-pit4-jian5)，馬英九自舊年開始，常常發表伊對台灣歷史个高見，閣好意叮嚀(ting1-ling5)汝咱遮个新台灣人，【不要受那些自以為懂台灣史的人的影響】。

《與馬英九論台灣史》共馬英九sau1-phi5講，如果汝認為家治捌台灣史，按呢阮是毋是勿予汝影響著？

到底是馬英九卡捌台灣史，抑是李筱峰卡捌台灣史？當然李筱峰才是專家。毋閣，究真台灣史全面个真相生做啥款？或--者換一種問法，咁有所謂歷史个真相即種物件？我自細漢精神上著真苦痛(thang3)，除了家治命底登戴(mia7-te2-ting1-tai3)个性質有干礙，我 phu2-chang1个少年時代嘛是國民黨个威權體制佮教育所賜个。《與馬英九論台灣史》是予我看甲真爽，總是，想卜到極頭來了解台灣、了解家治，彼是一世儂个修行路。