舊戲園

本文

入去一間真舊个電影院，裝潢簡單，塗跤佮壁攏用紅毛塗抹抹咧爾爾，椅仔是𠕇𠕇个枋仔，無軟軟个膨椅通坐，迄種舊式个戲園[hì-hn̂g]。

伊有隔做無仝大細，三間放影廳，攏做仝齣。影片已經開始咧做矣，我行入去揣(找)位坐，哪行哪想講，即種戲園我咧睏个時，定定夢著。

行到較細迄間放影廳，有儂咧調整銀幕，將頂下[tíng-ē]閘一部份起來，本底个小銀幕，就按呢變做景色壯觀，比大間放影廳个效果閣較好个超闊銀幕。

我精神過來，才發現頭拄仔是咧眠夢。

細漢个時，先對電視有概念，後來予大儂𤆬(帶)去看電影，就想講，遐爾(那麼)大个銀幕後壁，一定有足複雜个機械佮零件，親像一台海翁大个電視機仝款。毋知到當時，我才發現銀幕後壁空lo-so，啥乜攏無，只是一塊布。

現步我掠叫是家己已經清醒，咧扑字寫即篇予逐家看，大概也猶原閣佇眠夢中。各位攏佇我个夢中，我也佇恁个夢中。

張翠苓
按呢…我可能嘛是陷眠的時….夢著潘老師寫一篇舊戲園

我看的頭一齣電影
是國校仔五年，學校tshuā阮去看--岳飛
我毋知電影的來源是啥
nā 看nā煩惱
掠作偉大的人，自細漢就有人佇身邊做紀錄…出世時坐跤桶覕水災..較大漢用柴仔佇塗跤學寫字…等等

我是煩惱我大漢了…若是做一个偉大的人…攏無遮的紀錄…
哈！！有夠戇！！

潘科元
翠苓姊免倚靠別儂，攏嘛用母語文家己記錄！

T-ho Lau
Tsong-sing hiáu bōng

Tiunn Siok-tsing
老師…
精神精神喔…

潘科元
回魂喔回魂喔

Tiunn Siok-tsing
今~~敢是佇夢中回也 ^^

Tiunn Siok-tsing
我細漢定定夢著一個夢,若凖是咧放電影…開始到結束逐回攏共款….

張翠苓
誠好…看免錢電影！

Tiunn Siok-tsing
一點仔攏無好..
因為…夢見个是…

佇咧一條斜面的大路，較低這爿是一絛足大條的大溝，逐回攏是按溝墘開始，我走佇頭前，後壁有一個乾埔舉刀共我追；我沿溝墘一直走一直走，後來正彎過一個橋，過橋了後復一直走，走到一直較細的路，印象中正爿是一排大樹，左爿干若是厝．走到路尾正彎看着一大片大埕，彼時夢中對獨己講：｛廟到啊，安全啊！｝，就醒來啊！

這種夢,干但放電影….逐工來一回!一直到我出社會 ><”

Gillian Ho
潘老師這篇實在真趣味。（看了，才知影＂精神＂是按呢寫哩）