俗語：無心扑石，石交圇[ka-nng5]

本文

「有心扑石〇〇〇，〇〇〇〇〇〇〇」即對台灣俗語有幾若種講法，其中一種是按呢：

有心扑石，石成磚；(U7-sim# phah-tsioh8# tsioh8# tsiann5-tsng)
無心扑石，石交圇。(Bo5-sim# phah-tsioh8# tsioh8 ka-nng5)

成磚，就完成一項對儂有路用个物件；ka-nng5 是規粒好好，照原，無tsun3-bun7--著。

我對即對俗語个疑問是，總共出現四擺个「石」字，第二擺个「石」（「石」成磚）、第四擺个「石」（「石」交圇）是唸本調抑是變調？有儂是第二擺「石」本調，第四擺「石」變調；有儂敢哪是全部四擺个「石」字攏本調。

請教先進諸君，擼力。

補充：其他个講法至少有：

有心扑石，石#成穿[tsiann5-tshng]；
有心開埔[khui poo]，埔#成園[poo tsiann5-hng5]。

有心扑石，石#成磚；
有意開山，山#變園。

台語變調真複雜个所在，是有分「句法」佮「詞法」个層次，就句法來分析，輕聲無論，非代名詞主語尾字本調是定著个。但是兩字至三字个結構，有時會對句法層次徙去語法層次，一旦詞彙化了後，就真有可能會連紲變，只賰上尾字本調：

像「客滿#、火燒厝#、國泰#民安#（兩字＋兩字，即个詞其實有三種唸法：國泰＃民安＃、國泰＃民＃安、國＃泰＃民）」，但是閣毋是絕對按呢，像「心#悶#、頭#疼#、地#動#、胃#潰瘍#」。

汐止舊名「水轉跤 Tsui2-tng2-kha」（有各種變音）个「水」字有變調，這就是詞彙化進一步影響聲調行為个結果。閣像台灣西部有地名「水流東」，咱若無聽在地儂講，就僫斷定「水」字是本調抑是變調。

閣像七字俗語句抑是對聯、詩句个尾三字，雖然分析起來是主謂結構（有時是「兩字主詞＋一字動詞」，有時是「一字主詞＋兩字動詞」），但是真濟儂慣勢三字紲咧唸，成為「變變本」个聲調結構。

像「春風＃入室＃三陽泰＃，瑞氣＃盈門＃萬象新＃」，若準主謂結構是決定變調是唯一原則，「陽」「象」應該本調，但是較少儂按呢唸。

許嘉勇
阮鹿港說「ka5-nng5」，泉州亦是。

Andy Chen
只種「非漢話」ê頭字khah有聲調異常
Ka-nng5 潮州頭字是陰平，泉州陽舒
Pa-loi7/loe7 潮州頭字是陰平，泉州陽舒
Ka-ti7 潮州頭字陰平，泉州kài-sêng是陰平陽舒兩可

W.b. Chen
嗯嗯，「詞彙化」是關鍵詞，關鍵概念。

Gina Tseng
所以，台語的聲調閣誠有通研究咧，趣味性加真濟。

蕭平治
攏本調，石是名詞。

May Lin
嗯~~~我是按呢唸!毋過,毋知啥根據!