英語共欲上台个儂講 "Break a leg"。因為伊字面个意思是「斷一支跤」，講即句話袂輸是咧咒咀予儂發生不幸，但是其實這是好意个話，祝福儂演出成功、運動比賽勝利个時塊講个。
"Break a leg" 即句祝福話个語源，僫得稽考[khe-khó]，有濟濟解說[ké-sueh]。佇遮簡單舉--寡。有一種「迷信說」[bê-sìn-sueh]，認為正面講好話，顛倒破格[phuà-keh]；抑講歹話，顛倒是好吉兆[hó-kiat-tiāu]，所以才刁工共儂講 "break a leg"。
亦有一說[tsi̍t sueh]是「抾賞銀」。卡早佇英國戲園，煞戲个時，觀眾若看了無高興[kau-hìng]，有時會tàn一寡爛菜蔬起去舞台頂。抑若逐家看甲真暢樂[thiòng-lo̍k]，著有觀眾tàn錢起去。演員會扑半跪[phah-puànn-kuī]去抾賞銀，看起來袂輸是跤斷一kue̍h按呢。所以對一个臨上台个演員講 "break a leg"，等一是希望伊演出受歡迎，thang得賞銀。
閣有講，古早希臘[Hi-lia̍p]，觀眾表示呵咾，毋是扑pho̍k-á，是用tsàm跤个。若傷激動[kik-tōng]，tsàm了太大力，跤骨敢會tsi̍h--去。所以 "break a leg"，著是希望得著觀眾熱烈个喝采[hat-tshái]。
亦有一種，我認為重要个「倚音說」[uá-im-sueh]，相信伊个語源本底是中西歐个Yiddish話 "Hatsloche un Broche" 意思是「成功佮福氣」。德語共伊吸收來，變做倚音个 "Hals- und Beinbruch"，意思是「跤骨佮頜頸斷去」。
以上攏是參考 Wikipedia - Break a leg。伊有提起，歐洲真濟語言攏有親像即號表面是歹話，其實是祝福个話。德語、波蘭話、土耳其話、俄羅話[Ngôo-lô-uē]、法語、I-tá-lih話。像法語會講 "Merde"，意思是「屎」！
有一點要緊愛注意，聽著儂講即種祝福話，袂使直接應多謝。因為按呢嘛是一種破格－－心肝內知影儂咧祝福汝著好，袂使直接表現出來，無，會歹吉兆。親像I-tá-lih講 "in bocca al lupo" （字面意思是「佇野狼喙裡」），愛應講 "crepi (il lupo)" （野狼去死）。
但是 Wikipedia 並無提起英語應該按怎回答。我另外查著个資料，知影英語並無即種禁忌，怹猶是慣勢應講 "Thanks"。參考即段 VOA Learning English 个教學。
Wikipedia 有講，佇澳洲 "break a leg" 已經變做歹話喇，怹祝福儂演出成功个話是 "Chookas"，原意是「雞」。票房若䆀，只好食pháng過頓，票房若好，才有全雞大餐通食。
對以上个介紹，咱知影人類个語言文化，有一項真要緊，但是逐工咧使用語言个社會大眾，甚至一寡語言專家無一定真正理解个特色，著是「話語个意思毋是絕對个，但是會凍合情理來判斷[phuànn-tuàn]--个」。一方面，話語會演化，卡極端个情形，本底是好意思，可能會變做歹意思；歹話嘛會變做好話。抑本來予儂認為蓋粗俗个話，嘛有一寡演變做予儂感覺無遐嚴重个話。亦有雅氣好意話，變做予儂感覺假仙假tak个話。
語言欲tshiû根源是大學問，但是著準咱最後會凍確定伊个語源，嘛袂使根據彼來理解即个詞、即句話，佇現此時、現都合[too-ha̍p]講出來，到底是欲表達啥乜意思。這需要在場个講佮聽雙方面，先充份掌握彼此所用个、自古早發展到即馬个即套語言文化，閣按照當場前後話意思个連貫，雙方互動个態度、口氣、舉止種種，來判斷決定。這著是我所講「合情理个判斷」。若干焦拘泥[khu-nī]佇語源、字面來解說意思，是不懂[put-tóng]个。
即種合情理个判斷，若有動機無純个儂，刁意故共伊歪tsuāi做別款意思，閣講甲袂輸伊是正義个化身。好个講做䆀个，輕可个講做食力个，或者是顛倒píng个情形，這號做「𠢕uân話」。若只是咧滾耍笑，uân話亦算是一種幽默感[iu-bi̍k-kám]；不過，若是欲搬挑[puan-thio]予儂不和、使弄[sái-lōng]予儂冤家，uân話是上簡單做个大罪惡。
Comments powered by Disqus.