華語〔萵苣〕，中北部台語是「萵仔菜」。北部泉腔講 e-á-tshài（老泉腔是 er-á-tshài），所以餐廳攏寫做「A菜」。宜蘭、中部漳腔講 ue-á-tshài。
台南、馬公講「鵝仔菜 gô-á-tshài」。（鵝仔菜，有儂指〔山萵苣〕）
高雄、屏東个台語叫做 meh-á-tshài（北部三芝、彰化田尾、永靖也按呢講），教台典猶原寫「萵仔菜」，《新編華台語對照典》寫做「猛仔菜 mé-á-tshài」，無論 meh 抑是 mé，後壁接「仔 á」就變仝音高平調。
後來南部先引進中國大陸品種个〔福山萵苣、嫩葉萵苣〕，形體接近 meh-á-tshài，但是較幼，阮南部共伊號做「tāi-lio̍k-meh-á」。慣勢講華語个儂掠做是咧講「大陸妹仔」，所以漢字攏寫「大陸妹」。其實台語若欲講「妹仔」是唸 me-á，前字是變中平調，佮「meh仔菜」第一字變高平調無仝。
也就是在地品種个〔萵苣〕，餐廳寫做「A菜」，是來自北部腔个台語，但是中國〔福山萵苣〕个「大陸妹」是對高屏腔台語變化出來个。結果，全台灣攏會曉用華語唸〔大陸妹〕个菜名，煞真少儂知影這是來自台語 tāi-lio̍k-meh-á 个稱呼。（2017-03-19 補充：台灣華語〔大陸妹〕个講法愈來愈普遍，最近我聽阮阿母、阿姑怹攏綴咧講矣，台語真慘！）
另外一種菜，叫做「苳蒿仔 tang-o-á」，泉腔有儂講 tang-er，前字變中調，按呢前字本調是第一聲，漢字著寫「苳蒿」；但是有个泉腔講講 tâng-er，前字變低調，按呢前字本調是第五聲，漢字著寫「茼蒿」。華語文攏寫做〔茼蒿〕。煮火鍋定定用著，一大堆苳蒿仔，煮起來變一點仔，有儂就叫做「扑某菜 phah-bóo-tshài」。「苳蒿」佮 meh-á 仝科無仝種。
（2015-11-29 面冊網誌）
Comments powered by Disqus.