華語「奶罩、胸罩」个台語

照阮所知，華語「奶罩、胸罩」、英文 brassiere（簡稱 bra），台語至少有幾種講法，「奶帕仔 ling-phè-á」、「奶噗仔 ni-phok-á」、「內䘥仔 lāi-kah-á」、「bu-lá-jiah」。

分析：

「奶帕仔 ling-phè-á」，「帕」白話音 phè，本底是名詞，轉做動詞，意思是「包、掩[am]、遮崁[jia-khàm]」，加詞尾「仔」閣轉轉[tsuán-tńg]來名詞，「奶帕仔」字面意思就是「掩 奶模[ling-bôo]个物件」（奶模 就是【乳房】）。像「尿帕仔」个構詞法也差不多。

「奶噗仔 ni-phok-á」，佇台南問著个，台南「奶」講 ni（另外泉腔講 lin）。「噗 phok」佮「膨 phòng」攏有漲大[tiòng-tuā]个意思，但是「噗」是雄雄變大（所以用入聲，短促音來表現），而且有灌空氣、冇冇[phànn]、無實、擋袂久个感覺，伊是動詞（例：「噗起來」），嘛是形容詞（例：「看起來噗噗」），加詞尾「仔」轉做名詞。「奶噗仔」字面意思，應該就是「予奶模噗起來个物件」。

「內䘥仔 lāi-kah-á」，即種講法上婉轉，嘛上含糊。「䘥仔」就是【背心】，一切穿佇內底，無䘼[ńg]个，卡薄个衫，攏算「內䘥仔」。總是，伊真濟時陣是特別指 bra。是阮即種斯文儂上欣賞个講法 XD

「bu-lá-jiah」，是英語吸收法語 brassiere，日語閣吸收英語，台語閣吸收日語个外來語。

毋過，brassiere 个本意 (bodice, child's vest)，其實足倚台語个「內䘥仔」，用法嘛真婉轉含糊！咱个台語會使直接對應英語、法語，毋免學北京話啦。

華語「馬甲」，阮遐台語講「戰甲 tsiàn-kah」。愛媠著愛大作戰！