（2010-11-12發表佇Facebook。共伊留一份蹛遮）
Koàn-Chhiū 來寄話：「科元汝是萬丹人sio! 萬丹國小對面有一間廟, 萬惠宮, m知汝有tiaⁿ-tiaⁿ去boo? Hit間廟足出名, 是對場起, 正peng倒peng是兩e無仝e師父起e, 所以正peng倒peng雖然寸尺相仝, 但是花樣無仝. 我有專工走去看hit間廟. http://tw.myblog.yahoo.com/perennial-20071001/article?mid=34463&prev=34827&next=34250 」
Koàn-Chhiū，二十年前咱拄熟似，汝著捌共我提起即層代。我真見笑，近廟欺神，無好好仔關心阮兜tshua̍h對面即間萬丹鄉上重要、上大間个媽祖廟个建築。晉前，我戇戇毋捌寶，問阮爸爸講，媽祖廟遐舊矣，哪會攏無重起，伊講管理委員會無咧用心經營。後來有汝个提醒，我轉去才卡要緊走去看詳細。我招阮叔伯小妹，tshuā阮兄迄个閣細漢个大囝做伙去。
迄tsūn媽祖廟已經開始改建，廟前搭架，廟內日光燈火huánn-huánn，壁堵予香煙[hiunn-ian]薰甲烏烏，幼路个雕刻彩畫看袂明矣。我徛佇大殿內，攑頭越來越去詳細共siòng，比較分金[hun-kim]雙爿，斗仔[táu-á]拱仔[kióng-á]東西，形體花草，設計完全koh樣，有影是對場作（即三字毋知按怎唸，扑算是 tuì-tiûnn-tsoh）。
若一般个信眾，行入廟內，一心排金點香、下神託佛[hē-sîn thok-pu̍t]、抽籤跋桮，ànn腰跪拜，攏無咧hiàng身攑頭、遮看遐相个，根本注意袂著伊建築个特色。我佇遐看不止久，小妹怹坐佇壁邊个椅liâu，幼秀个伊細聲仔講古予阮孫仔聽，扑算to亦講幾若站去，毋知伊即陣講到頂峘个佗一个圖矣？
離鄉閣上北，過真久，閣轉去看，厝kuà換過，頂峘迄三字萬惠宮个書法，予儂袂呵咾得。我入去踅一lìn，看著內內外外歸个翻新，舊个攏無去矣。最後，我踏出廟門，看著唯一保留椆咧个迄對老石獅。阮細漢定定peh起去石獅公[sai-kang]个尻脊骿，坦敧身對倒爿伸長手入去伊个喙空內，欲共迄粒石珠對伊li̍h-sai-sai个喙縫撈[lā]出來，li-li lo̍k-lo̍k，khi-khi kho̍k-kho̍k，卡按怎to差釐絲仔，撈袂出來。
（Koàn-Chhiū，汝予我个網址，內底翕个萬惠宮是新形體，毋是舊規模。）
閣看過廟對面，萬丹國小个舊大門，彼是一座設計了非常有創意，全台灣扑算無塊通閣揣个大門。建築師對「文」--字發想，將「文」下底兩筆相叉[tshe]了後个線條拖長變形做大大闊闊个彎弓形，成做大門个出入口。後來，別位蓋濟學校个大門愈起愈氣派，總是，我毋捌看過有一間个設計像伊遮爾簡單雅氣閣有教育內涵个。
即个大門亦變做萬丹國小唯一保存我做囡仔讀冊个記持个建築，其他全部个校舍攏拆掉重起，教室區佮運動埕相對換。阮細漢用過，日本時代留落來个教室，內底个椅仔後壁有漆「萬丹公學校」个字。khàm烏瓦个音樂教室，峘大个厝蓋下跤有蜂岫，我無因無端[bô-in-bô-tuann]，煞綴儂攑長竹篙，去共thà-thà落來，過身我一世儂懺悔。邊--仔一片[phiàn]花園，下課時間阮會走去挖塗香[thôo-hiunn]、敕甜甜个花汁。亦有幾若欉好蔭ńg个大樹，學校定定叫阮查埔查某學生手牽手，蹛樹仔跤學練土風舞。庄跤囡仔畏儂tshiu，有儂會抾[khioh]幼幼短短个樹ue，兩个一儂ni̍h一頭，無愛予手 sio kha̍p著, 閣袂予老師發覺受氣。運動埕所有个運動設施，包括一座用橫kuainn 一支一支làng-phāng 接甲遠遠个鐵架，予儂離地giú咧進退，訓練手骨力。我捌佮儂peh起去耍，對頂峘跳落來，雙跤後tinn攏tǹg傷。閣有彼足舊漚[kū-àu]，siûnn leh-leh、臭kōnn-kōnn，風聲講其中某一間封起來个屎礐仔有鬼个便所厝，一切个一切全部對地面消失去矣。學校佇新教室大樓正面開一个新大門，舊大門變偏門。
萬丹國小改建，校園按怎重規畫，是照迄時屏東縣長伍澤元[Ngóo Ti̍k-guân]个phah-tat。伊讀師範、警官，最後閣提著工學博士，加入國民黨，學歷經歷完整。做甲省政府交通處長个時，連戰派伊轉鄉里[tńg hiunn-lí]，大尾鱸鰻鄭太吉縣議員扶伊，來佮想欲連任屏東縣長个蘇貞昌競選相殺。利用派系个矛盾，tshuàn行漚步，共政績極好个蘇貞昌做掉，換伍--个做縣老爺。鄭太吉後來開銃刣儂，hông判死刑。伍澤元後來因為早前佇省府辦理四汴頭[sì-pān-thâu]个工程食錢，piak-khang，予法院判重刑，關入籬仔內。伊tsua̋n nǹg律法縫[lu̍t-huat-phāng]，申請保外就醫，走出來選立委，予伊選椆，繼續逍遙。閣連任才失敗，藉詞[tsià-sû]出國考察，phu-lú-su̍t，阿婆làng-káng走中國。過六、七年，伍澤元六十三歲，糖尿病giâ，佇上海死。
抑越頭轉來看蘇貞昌，伊iáu閣為台灣佇咧衝衝衝，選甲phīnn-phēnn喘。毋知台灣儂到底是知覺醒抑毋知醒，學會曉捌[bat]好歹儂抑袂曉？
萬惠宮即个對場作，是日本時代，萬丹个大好額儂李開湖[Lí Khai-ôo]做媽祖廟个大總理[tāi-tsóng-lí]个時，伊倡首[tshiòng-siú]翻修个，當然伊出上濟錢。阮潘家迄陣雖然無好過，阮阿祖嘛有題緣[tê-iân]--幾圓。細漢个時，阮阿公捌專工tshuā我去看廟內壁邊石碑面頂，有阮阿祖姓潘[Phuann]、名朑[Sê]，kuà寄附幾箍銀刻佇遐。阮阿公雖然細漢佇公學校讀無幾工冊，捌無幾个字，著停學轉去共厝裡鬥作穡。伊對阮遮个囝孫仔即種佇生活中進行个教育，比啥乜攏閣卡寶貴。
李開湖个後生查某囝，有兩姐妹去日本留學，一个是佇早稻田大學。怹轉來台灣，後來攏無出嫁，蹛厝裡。Tann姐妹雖然年老，猶閣數念tsun-tshûn怹過往幾十年个視大儂。有好tsia̍h-mi̍h，會先排踮公媽龕[kong-má-kham]頭前，袂輸視大儂iá佇咧按呢對怹講話，請怹享用。我捌綴一个佮怹相好个阿姆去怹个古店厝拜訪，叫怹阿姨，怹真歡喜，慇勤[in-khîn]接待阮。佇大廳个水晶吊燈下[ē]，講著怹老父老母个íng過，兩儂个面容不止光彩。
Comments powered by Disqus.