行天宮收起大香爐

行天宮將大香爐收起來，叫信眾勿點香，改用手拜拜。這有儂呵咾、有儂批評。

呵咾个 講按呢才是保護環境、節能減碳[thàn] 進步个做法；批評个 講按呢違背宗教傳統，也害著宮外賣香个艱苦阿sáng無通賺食[tsuán-tsia̍h]。

扑算廟方猶原會閣點靜香[hiunn]，若無，一間廟全然無香[hiunn]味，有較各樣[koh-iūnn]。

若正佛教个儀式，有用鮮花芳香[tshinn-hue phang-hiunn] 供養[kiòng-iōng]諸佛菩薩，高雅个芳味，清除汙穢[ù-uè]、提神淨心，幫助咱修心養性。但是無咧燒金紙，因為燒金紙等一是相信神明欠用錢，愛提錢予伊，伊才會保庇咱，煞親像咧買囑[mái-tsiok]官員咧，無合佛教教義。

像鹿港龍山寺，本來有香爐，無金爐，廟埕外口有一个敬字亭，是咧予儂燒字紙，毋是予儂燒金，後來敢[kánn]是袂堪得信徒討，煞佇廟邊加[ke]起一个大型个現代金爐，按呢實在是退步。

但是一般民間信仰[sìn-gióng]个宮廟，毋但愛燒香，閣愛燒金，燒愈濟愈好，重點毋是佇咧芳味，是愛燒火燒予旺旺旺（所以真濟儂號名做火旺 ^_^ ）。行天宮扑算真早就無咧燒金矣，即馬閣進一步，連香爐都取消，確實是真「先進」！

香也好、金紙也好，品質䆀个真濟，化驗起來，內底有袂少致癌物。尤其是台灣佮中國三通了後，生理儂貪俗，對中國大量進口金香紙燭[kim-hiunn-tsuá-tsik]，中國金紙摸著較粗較厚，色緻殕殕[phú-phú]，燒起來个氣味閣會激鼻[kik-phīnn]。定定出入宮廟，特別是長期佇廟內服侍[ho̍k-sāi]神明个儂，肺部真凶險，健康受著大威脅。

一間廟不管時攏點香燒金，薰甲白茫茫無看見儂面，按呢有影無衛生閣討債物[mi̍h]。撙節金香个使用量，這我有贊成；若欲一睏鏨斷，愛閣參詳。

各位先進，有對行天宮个情形較了解个，敬請指教，感謝。