〔賽跑〕台語有講「走標」

「賽跑」，台語儂有講 tsáu-pio，這是台灣近代才有个講法，福建無按呢講。無論是1873 廈英大辭典、1931 台日大辭典攏無收，而且也毋是台灣各地攏有講。1934年10月 595 卷个教會公報有鄭溪泮文章〈Phang-bī Móa-chhù〉(芳味滿厝）其中一段有出現：

Lâng nā ū chīn-la̍t, m̄-nā bô kàu, tiāⁿ-tio̍h ē koè-thâu. Phì-jū cháu-pio ê lâng, í-keng kàu koat-sèng tiám, iáu-kú sè-bīn chhin-chhiūⁿ beh koh cháu, ū-sî cháu koè-thâu. Kho-ha̍k-ka “Ka-sok-tō͘” ê la̍t, kiám m̄-sī án-ni mah?

（以上轉寫做漢字：儂若有盡力，毋但無夠，定著會過頭。譬喻走標个儂，已經到決勝點，猶久勢面親像欲閣走，有時走過頭。科學家「加速度」个力，咁毋是按呢嘛？）

tsáu-pio 有先進主張著寫【走飆】甚至【走驫】。請試想，這到底是近代佗一个飽學个台灣先賢，會曉得去古文內底揣著遮爾深奧个【飆 piau/phiau】、【驫 piau】--字 來改唸白話音 pio，創造出【走飆】即个詞，閣傳播出去？

我認為即條理路，不可思議。這本然是一寡平埔民族（包括 Siraya、Kaxabu等等）佇節日予少年家【走標】比賽个風俗來个。

【標 pio】有雙重意思，一是名詞【目標 bo̍k-phiau/piau】，二是動詞【標射 pio-siā】。名詞用法，像扒龍船个終點，有插一枝標旗，船頭个儂著愛【搶標 tshiúnn-pio】。原住民个賽跑，當然著愛 標[pio]足緊，去爭取終點个目標彩旗，所以台語儂才共伊號做【走標】。遮所講个台語儂，無的確是福建移民，閣較可能是已經漢化个平埔儂。

分析起來，【走標】字面意思會使解說做 run for the goal ，也會使當做兩个動詞合做伙个複合動詞。

先有【搶標】即種舊口語詞（台日典有收），近代台灣百姓才照仝款个理氣，創造出【走標】，我毋相信是去古文揣難字發明即个新話。而且因為語源是部份原住民族个風俗，所以並毋是各地个台語儂攏有學著即个詞。

咱佇台灣人類學家个記錄也看會著，怹攏是寫做【走標】，毋是對古漢文生出來个【走飆】。

咱欲稽考一个台語詞个漢字，無應該直接去古漢文揣字，著先看即个詞佇閩台語各地區个分佈情形，十九世紀、二十世紀初期个台語文獻有出現無？有佮別種語言、文化 相tsih-tsiap 無？若是近代才有、佮異文化接觸了後才有，煞去古漢文揣字，可比是去牛墟牽豬哥。

我細漢就定定聽著阮阿公講伊透早就起來【走標】運動，伊是 1900 年出世，我講走標是近代才有，即个近代差不多是清朝尾開始。走標本來是「賽跑」，演變个結果，詞義擴大，包含家己一儂个慢跑運動。