「送時鐘」本是台灣好禮數，毋是禁忌

華語儂有个無愛儂送時鐘，因為華語〔送鐘〕佮〔送終〕仝音。在台語儂來論，「時鐘」个「鐘」台語唸白話音 tsing（文言音才唸做 tsiong），若是「終」字攏唸做 tsiong，tsing 佮 tsiong 無仝音。而且華語〔送終〕个意思，台語講「送上山頭 sàng tsiūnn suann-thâu」，嘛有講「送山 sàng-suann」，所以閣較按怎牽，也袂因為仝音个關係來發展出「送鐘」个文化禁忌[kìm-khī]。

實際上，以前个台灣儂真愛送時鐘，像開店，抑是入厝个時，親情朋友攏一定有儂會送時鐘來予主儂掛，上早是迄種大副个，有 hi̍t-á（時鐘墜仔[tuī-á]、〔鐘擺〕），逐工愛捘[tsūn]一擺才會繼續行个老爺鐘，後來是食電池个時鐘，有个下底連接一面長鏡，無論送佗一種時鐘，玻璃面个邊=仔會專工用紅字寫講某儂為著啥事來祝賀某儂、某店，實在是實用閣大範[tuā-pān]。

文明開化个國土，無聊个禁忌應該廢捒。華語「送鐘」个新迷信，也無必要閣湠落去。

原文發表佇面冊（Facebook）2015-01-27