本文
「教」白話音 kà，教典收兩个義項：
傳授知識、技能、道理或解答疑惑。 例：這我袂曉，請你教一下。Tse guá bē-hiáu, tshiánn lí kà–tsi̍t-ē. (這個我不會，請你教一下。)
引申為指使的意思。 例：啥人教你按呢做的？Siánn-lâng kà lí án-ne tsò–ê? (誰叫你這樣做的？)
就阮个腔口來論，伊第二義項愛唸第四聲 kah 才著，毋是唸第三聲 kà。像講：「即个囡仔真好kà」佮「即个囡仔真好kah」，意思根本無仝，前一句是真容易教導、教育；後一句是叫伊做啥，伊就趕緊照做。若照教典所記，就分袂出來矣。
閣五工就欲大投票囉！地方選舉有一句蓋出名个宣傳詞：「好央教！」。這泉腔講「好 iong-kah」、漳腔講「好 iang-kah」。「iong / iang」寫「央」就是「央託」；「kah」就是「使喚」，勉強寫做「教」，但是無應該唸一般 kà 个音。候選人講伊「好央教」，就是講咱若選伊，伊就會予咱真好央託，欲叫伊做啥，攏真容易。
閣舉一例，一句真好个孽詰仔話「新被[phuē] 送牽手－－好tshe-kah」。這是「好妻 蓋[kah]」（予好妻 蓋被）佮「好差教」个雙關語。迄个「蓋」佮「教」攏愛唸 kah 才著。「差教 tshe-kah」是類義並列複合詞，「差」是「差遣」，「kah」是「使喚」，較偏向用口頭叫儂做代誌。
頂面教典第二義項例句：「啥人教你按呢做的？」迄个「教」變調了後，台語一般腔就分袂清本調是 kah 抑是 kà 矣。但是阮細漢个經驗印象真深，若是做毋著代誌佇咧後悔，老母定定教示講：「Siáng kah–lí–ah?」是講本調 kah，毋是 kà。意思是講：這是你家己做得來个，無儂叫你著按呢做。
不而過，凡勢仔有个所在，連老儂都無分 kà、kah，攏講 kà，若按呢我也尊重。總是，我感覺無分 真無彩，因為較無精密。臺日大辭典就有分，佮阮仝款。參考：
http://taigi.fhl.net/dict/gm.php?fn=A/A0220.png
第一个詞條，伊有收一个真有力个俗語：「kah猪 kah狗，毋值家己走」。 另外，「iong-kah」、「tshe-kah」臺日大辭典攏有收，毋過 iong-kah 个漢字伊寫「央教」，tshe-kah 个漢字伊寫「差使」，無一致無好，總–是，即兩个詞伊个音有準，是 kah，毋是 kà。
若是各地个老儂普遍會曉分，按呢教典就確實毋著，愛修訂。
面冊網誌留言
林文信
咱這音教kah佇華語也是仝款是叫的意思，往過我的序大人嘛是安呢講，啥教kah汝，應該！彼是佇罵我講，啥人叫汝欲安呢做，應該！
華語：
直教人生死相許
唐詩：
秦時明月漢時關，萬里長征人未還。
但使龍城飛將在，不教kah胡馬度陰山。
葉程允
我自細漢聽是有分
敢會教典又拂毋著去?
Ping Hua Si
51出：「 咱將經提來去甲伊教咱，何難哉？」
(龍彼得、施炳華校訂 2001.11《泉腔目連救母》 財團法人施合鄭民俗文化基金會)
Comments powered by Disqus.