「鄭」个台語腔：漳泉濫舉例

頂禮拜點名，點著一个蹛三重埔个學生，我講伊姓「鄭 Tīnn」，伊講怹兜是唸「鄭 Tēnn」，我問講恁咁是在地儂？伊講怹一直蹛佇三重埔。我講若是三重埔个台語腔，照講是唸 Tīnn，但是恁兜若慣勢講 Tēnn，我著尊重。

即禮拜上課，我點名个方式是我唸華語音，叫學生用台語應聲，講「我是〇〇〇」。即擺伊煞主動換喙講「我是 Tīnn〇〇」。

問一下真，原來 Tēnn 是伊國小老師教个，怹轉去問厝裡，才確定是 Tīnn。

以下兩點小感想：

一、台語一直咧進行「漳泉濫 Tsiang-Tsuân-lām」个融合過程，形成「不漳不泉 Put Tsiang put Tsuân」个優勢腔，台灣無論幾歲儂，攏有可能將外口較優勢个講法，當做是家己个腔，煞將家己个公祖話當做外地腔。

二、尤其是學生囡仔，對這愈無概念，台語老師著愛對伊所教个學校當地个台語腔，有相當个認捌才好。

補充：阮屏東萬丹是漳泉濫真明顯个混合腔，像「田嬰」（蜻蜓）攏講 tshân-inn，無講 tshân-enn，但是「鄭」是唸 Tēnn，無唸 Tīnn。有研究台語，才知影其實即兩字漳腔攏是 enn 韻母，泉腔攏是 inn 韻母，阮一字唸 inn 韻母，一字唸 enn 韻母，但是「紅嬰仔」又閣慣勢講 âng-enn-á 無慣勢講 âng-inn-á（按呢才袂佮「紅圓仔 âng-înn-á」變仝音），所以阮若靠直覺，就袂感覺 tshân-inn 个第二字可能是「嬰」--字。這攏是漳泉濫个現象。