「閩台語」vs.「台閩語」

我咧討論台語問題，有時會用著「閩台語」即个詞，佇遮說明一下：

一、「閩台語」是並列結構詞，「閩南語 佮 台語」合起來个簡稱。指「閩南語」佮「台語」个共同成分，因為這是對閩南先開始，所以先寫「閩」才寫「台」，來符合時間進程。

可比若佇《廈英大辭典》（1873，代表閩南語）佮《台日大辭典》（1931，代表台語）攏查會著某一个詞，我欲強調這無論是福建抑是台灣攏有儂講，就會稱呼彼是「閩台語」。

二、請注意：有寡台文研究者會用「台閩語」个稱呼（先「台」才「閩」），這是偏正結構詞，是「台灣个閩南語」个簡稱。

加一字「台」來修飾「閩語」，縮小「閩語」指稱个範圍。即種用法，前提就是認定閩(南)語个範圍超出福建，包含台灣多數儂个母語。

因為我認同台語即个名稱，就是台灣多數儂个母語，當做代表性个稱呼，而且我也認同客話、原民話是台灣語言。親像英語、美語、日語个稱呼仝款是代表，但是怹國家閣有別種在地母語。

所以我攏叫做「台語」就好，無叫「台閩語」。

我較捷用「閩台語」，無用「台閩語」即个詞，準做有時欲用，也袂佇仝一篇文內，同齊用著「閩台語」佮「台閩語」來予儂花翱翱[hue-kô-kô]，看攏無。所以我毋免為著即兩个詞結構無仝，理解方式無仝 來「負責」 :-P