以下是寫予教育部台語辭典維護團隊的建議批，佇遮鋪出來請各位先進參考、賜教，勞力！
各位老師，平安：
關係教典的借詞體例佮相關各詞條的實際寫法，我佮台語界的朋友討論過了後，針對「明知影是外來語，但是到底是直接來自佗一種外語，爭議閣真大」的情形，咱是毋是有需要閣加設一个體例：「借自外語」？也就是免講是佗一種外語，當然也免講是佗一个外語詞。
舉例像 sap-bûn、ka-lí、ka-pi 這三个詞，咱認定是外來借詞，相信社會各界袂有異議。
但是這三个詞具體明確的直接語源佮語詞到底是啥，恐驚爭議閣真大。
一、雪文 sap-bûn：
目前教典寫講「借自法語」，咱的新體例，是講既然若知影借自啥物語，按呢就應該明確寫出是佗一个詞。所以檢校表才寫講欲改做「借自法語 savon」。不而過，後來我查著維基詞典「雪文」條目，是寫講：
來自葡萄牙語 sabão、早期現代西班牙語 jabón（來自中世紀西班牙語 xabon）或阿拉伯語 صَابُون (ṣābūn)，可能經由馬來語 sabun 或他加祿語 sabon。源頭來自拉丁語 sāpōnem，sāpō 的受格形，來自原始日耳曼語 *saipǭ。
（出處：https://zh.wiktionary.org/wiki/%E9%9B%AA%E6%96%87 ）
東方孝義《臺日新辭書》(1931) p.409 有收「雪文 suat-bûn」，伊括號註明是：「蘭語シャボンの轉訛」。日文的「蘭語」就是指荷蘭語。
所以教典直接認定台語 sap-bûn 來自法語，恐驚爭議真大。可能干焦會使得認定是來自歐洲的語言，但是也無排除直接的語源是南洋的語言。
二、咖哩 ka-lí：
目前教典寫「借自英語 curry」，陳修先生的《台灣話大詞典》也是按呢講。臺日大辭典有收【加里 ka-lí】佮真濟 ka-lí 的衍生複合詞，但是並無提起 ka-lí 是外來語。「咖哩」這種食品，拍算會使確定上早的語源是南印度 Tamil 語的 kaṟi，因為這種食品就是對遐來的。
但是台語所講的 ka-lí 的直接語源是毋是英語 curry 咧？張裕宏教授《TJ台語白話小詞典》就直接寫講 ka-lí 來自 Tamil 語。嘛有人講台語 ka-lí 是來自馬來語 kari（啊馬來語閣借自 Tamil 語 kaṟi ），是日本時代台灣佮南洋人來往所吸收來的借詞。就音本身來論，馬來語 kari 也明顯比英語 curry 較倚台語音的 ka-lí。
食品名 ka-lí 也有台語人是講做 ka-lé（佮舊詞「家禮」、「傀儡」同音異義），若 ke-lé 的講法應該就是對日語 カレー 來的。
三、咖啡 ka-pi：
台日典有收 ko-pi 佮 ka-pi 兩種講法，目前台灣大概干焦通行 ka-pi 爾爾。 照維基詞典所寫，ko-pi 是來自馬來語 kopi，問題是 ka-pi 是按怎來的？維基詞典是寫：
「臺灣話 ka-pi，臺灣客家話 kâ-pî，潮州話 gia1 hui1 和閩東語 gă-pĭ，可能是逐字讀半邊（有邊讀邊）的文讀。」
（出處：https://zh.wiktionary.org/wiki/%E5%92%96%E5%95%A1 ）
以上三个詞，佇臺日大辭典內底，攏無提起是外來語，但是我想台日典的編者一定知影彼是借詞，只是無確定遮的借詞直接的語源，所以才無註明。若是臺日新辭典，干焦有講「雪文」來自荷蘭語，ka-lí 佮 ka-pi 就無提起是外來語。
小結論：請考慮教典增加「借自外語」的體例（免講是佗一種語）。無，就先刪除以上三詞條的借詞註記。
勞力！
科元
Comments powered by Disqus.