阻擋學校實施母語教育个兩大藉口

長期以來，若講著「應該佇台灣个教育體制內積極實施母語教育」，就出現真濟反對个聲音，其中有兩項理由佇遮特別提出來反駁：

一、既然叫做「母語教育」應該佇厝內由爸母來教就好，無應該將即項責任交予學校。咱簡單提出兩點反駁伊：

1. 台灣儂个母語，長期予中國黨政府侮辱、蹧躂、禁止，怹共咱台灣儂洗腦，予咱相信台灣母語無氣質、無智識、無文化、無道德，無應該閣佮囡仔講，所以台灣當今五、六十歲以下多數个爸母真濟攏罕得佮囡仔講母語，若是三、四十歲以下个爸母，母語程度愈差，家己都講袂好勢，準做有心，嘛無才調教囝講矣。這佇人口集中个大都市愈嚴重。

2. 現代是多語接觸，劇烈競爭个社會，干焦有「聽」佮「講」个弱勢語言，絕對無可能佇仝一个社會內佮「聽、講、讀、寫」四項完備个強勢語言競爭。準做台灣爸母个母語一流媠，一般攏是干焦會曉聽佮講，袂曉教囝讀寫母語，這當然愛靠學校來教。

二、既然是「母語教育」，按呢全台灣任何一个國民个母語，政府攏有義務提供教育資源，包括對中國三十四省退守來台灣全部儂个母語，這實際上做袂到，所以規氣攏勿做，才袂傷著全體人民个感情。這就是一寡中國黨立委个論調。咱按呢反駁：

咱要求个母語教育，是「台灣母語教育」个簡稱。「台灣母語」是集合名稱，定義做「包含台語、客語、原住民各族語」个道理，是因為遮个語言早就完全在地化，有佇台灣形成佮自然、土地融合，有活力个語言族群佮有機个社區、部落。雖然遮个語言有个 是對別位遷徙來个，但是講遮个語言个在地儂，早就完全認同「在地腔」做標準，對家己个主體性有所認同，無閣認為「原鄉腔」才是較正確、較高級个，按呢才有資格叫做「台灣母語」。

即種融入在地、歷史深厚个台灣母語，有可貴个文化價值，但是目前當咧面對滅絕个大危機，所以才著撥出相當个教育佮社會資源特別保護佮傳承。