文訊雜誌社佮趨勢教育基金會等單位，2011年5月24佇台南國立台灣文學館辦理百年小說研討會。大會邀請作家黃春明先生做專題演講，題目是「台語文書寫與教育的商榷」。佇演講場抗議个[ê]蔣為文教授，對書寫台語文个理想形式，有伊明確个主張佮堅持，不過，迄種主張並無代表全部个台文運動者。無了解其中分別个社會大眾佮文化評論者，難免會掠[lia̍h]蔣教授个特定主張來反對台語文運動，造成討論失焦[sit-tsiau]。
黃春明先生演講个重要論點，是伊認為台語只要會曉講就好，根本反對讀寫「全台語文」（不管是全部寫漢字、抑是用羅馬字），只贊成用華文做主體个書寫系統。
關係台語、台文个爭論，咱愛分層次來議論：
一、上基本个，是咁有需要保存台灣母語？即點黃先生有贊同，政府已經毋敢表示反對（特別是選舉若到，逐个政治儂攏嘛真愛講台語來搝[giú]票），社會大眾嘛漸漸有同感（毋過，無一定有真正採取行動）。總講一句，語言毋但是溝通个工具，嘛是文化个載體，精神个認同、親情个歸依，袂容允用強勢語言來取代、消滅儂个祖先話、父母話。這是基本人權，普世價值。
二、閣來，台語若有需要保存，按怎做？咁有需要文字化？咁應該寫作「全台語文」？寫全台文即點黃先生反對，這才是咱欲辯論个重點。
認為台語本質上只是講个語言，幾千年來只靠一喙傳一舌，會凍活甲真好，將來嘛繼按呢落去就好，這是錯誤个觀念。因為時代改變啦！現代是多元文化、多語社會。強勢語言攏是聽、講、讀、寫，四肢健全，𠢕[gâu]走𠢕跳，但是咱个母語只有聽佮講，賰[tshun]一跤[kha]一手，半身不隨，絕對無法度佮強勢語言有比有並[phīng]、競爭並存[pīng-tsûn]。少年父母嘛因為按呢來看輕家治个祖先話，認為母語無字通[thang]寫、無冊通讀，無路用，所以怹毋肯教囡仔講台語，按呢早慢台語一定死。
黃春明先生一直強調母語應該佇自然、活潑个生活環境內底自然學習，無應該佇死板个學校環境內進行。但是咱台灣囡仔佇學校攏是華語環境，轉來厝裡，大部份个時間精神嘛攏予華語功課縛死死，即種情形已經超過五十年。台灣父母嘛煩惱囡仔佇學校內，國語講輸儂、功課綴儂袂著，所以攏毋肯對囡仔講台語，甘願用「台灣國語」佮囡仔講話。黃大師遐爾聰明精光个社會小說家，咁講伊看袂出即種現象，老早已經造成台灣青壯年以下，台語普遍無及格个嚴重問題？煞按呢無存[tshûn]天良，講啥乜「母語只要佇厝裡教就好，學校毋免教」？！
教育政策應該愛有遠大个眼光，關心文化理想，毋是只顧現實，所以袂使放據在即種「阿母毋肯教囝講母語」个台灣怪現象惡化落去。咱必需要佇學校教母語，而且是教「聽講讀寫」四種能力个母語，父母嘛應該同齊來學習。政府嘛著愛積極採取獎勵个各種政策，來引起台灣儂學習母語文个動機，才有可能來挽救祖語失傳、母語滅亡个惡運。
將即个層次个主題縮卡細，著是「咁有需要創作『純台語文』个台灣文學」？這我佇頂一篇〈黃春明先生演講「台語文書寫與教育的商榷」引起抗議，我个淡薄感想〉有討論著。
三、台語若有需要文字化，啥款書寫形式、系統，上蓋理想？這會使予逐家去試寫，才閣來檢討、調整，最後自然形成共識。其實，台語老早著有文字，而且文獻、作品非常豐富，只是過去無機會得著官方認可來標準化，而且進入全民教育體制，所以現時一般民眾對台語文有真濟誤解，普遍想講台語無文字。但是，經過台灣文化志士幾十年个爭取，目前教育部已經制定台羅音標，嘛有公告推薦漢字，工具盡量攢[tshuân]予便，來開放予社會各界去利用，並無要求一定愛全部用羅馬字，抑是全部用漢字去寫台語。
教育部公告遮个台語文書寫符號，並毋是即幾年才雄雄對石頭空煏[piak]出來个，是專家學者佮台語文寫作者，通力合作，將幾百年來个台語文獻（包括漢字、羅馬字）所用个符號共伊採取精華，整理出來个。
若欲寫台語文，到底應該採用全漢字？全羅馬字？抑是漢羅混合文？建議有心个台灣鄉親，毋通只靠直覺去評論佗一種台語文形式卡妥當，應該愛親身去學習、寫作過，才有法度真正判斷其中个好䆀[bái]得失。
以上第二佮第三層次个台語文議題，佇即遍黃春明演講衝突事件个檢討，一定愛分予清楚。因為黃先生根本閣停留佇第二層次个觀念爾爾。伊演講个論點就是，中國儂著愛寫中國北京華文，台灣儂攏是中國儂（因為中國台灣同文同種同風俗，無應該主張一爿一國），所以台灣儂攏著愛寫中國北京華文，無應該寫台語文。
伊根本反對咱寫全台語文，伊才無咧管咱是用漢字抑是羅馬字來寫。有儂將伊个華文台灣文學作品，改寫做全漢字台文，嘛予伊批講〔不倫不類〕。
足龜怪个是，伊反對咱寫台文，有一項理由是，台語各地腔口無共款，親像有鹿港腔、宜蘭腔，所以無法度寫做文字。伊按呢講根本是咧自我否定，因為伊寫个華文小說，內底有出現台語詞，親像「查某」？即種詞，中國除了閩南以外，根本無儂看有。閣再講，全中國華文作者个作品，咁無大江南北个口音差別，當然嘛有。是按怎華文會使寫，咱台文著袂使寫？
佇遮無閣隨條仔討論黃先生反對台語文个理由，詳細請參考鹿港儂中文系退休教授施炳華先生个批評〈黃春明演講現場實錄〉。
實在講，寫台語，根本是做一个台灣儂，非常自然个需要。政治卡開放了後，雖然因為逐家過去無受過台語文个教育，袂曉寫「全台文」，但是報章媒體，不時攏會出現一寡台語詞，親像「雞婆、鴨霸」，問題是按呢寫，根本錯誤。雞仔咁會比鴨仔卡「雞婆」？是按怎欲講「雞婆」，毋講「鴨婆」？鴨仔咁會比雞仔卡「鴨霸」？是按怎欲講「鴨霸」，毋講「雞霸」？完全講袂通。既然欲寫，著愛正確、標準，寫做「家婆」「壓霸」才好。
「家婆、壓霸」攏有收佇教育部臺灣閩南語推薦用字內底。台語毋是無字通寫，包括漢字佮羅馬字，家私[ke-si]差不多攏便便佇咧矣。總是，真正有咧寫台文个儂著會理解，台語無可能百分百用漢字來表記，因為台語足濟外來語，若用漢字烏白鬥，根本唸袂準，另外閣有真濟擬聲詞、擬態詞、合音字（兩字合做一音節）等等，太豐富，毋是死板个漢字應付會去。勉強揣一大堆罕用漢字、抑是不斷製造新字，只是鑿枷[tsha̍k-kê]家治夯[giâ]，激破頭腦。
到底是加學幾若千个無共形體个漢字卡緊，抑是去了解台語羅馬字16个字母个拼音原理，一[it]理通，萬理徹[thiat]，隨意來組合出千變萬化，漢字歹寫个台語音，佗一種卡簡單？看無羅馬字，只是一時个心理障礙。過去傳教士來台灣，教毋捌字个台灣百姓學羅馬字，三個月內著攏會曉讀羅馬字台語聖經。若學漢字，三個月咁有才調讀漢字聖經？
話閣講倒轉，像我寫即篇論說文，著會凍完全寫漢字，羅馬字只是做注音个路用。就即種觀點來看，學華文，愛學ㄅㄆㄇ；學台語，愛學羅馬字音標，攏共款是一種輔助。所以羅馬字亦會用得獨立當做比漢字閣卡緊學个台語拼音文字使用，抑是補足漢字个欠點來做「漢羅台文」使用，抑是當做幫助唸出漢字台語音个注音符號，實在是足好个工具。
論到創作台灣文學，使用啥乜語言卡妥當个問題。咱應該用包容心來對待，無論用啥乜文字創作台灣文學，咱攏應該尊重伊、歡迎伊、肯定伊个努力。總是，用「非台語」寫小說來描寫「台語百姓」个生活、對話，有一个限制，著是無可能完全表現出台語儂个氣口[khuì-kháu]佮感情。
這袂輸是作家佇咧創作个時，家治頭殼內攏愛先經過翻譯个過程，將人民个自然語言，轉換做伊个書寫語言。即種翻譯轉換，氣口定著會走精，感情定著會走味去。
過去因為統治者刁工、惡意欲消滅台語，毋肯予台語文進入教育體制，所以台灣人民普遍毋知影台語有文字，當然看無、袂曉寫。即馬情形無仝，既然官方已經公告台語音標佮漢字，嘛有袂少台語文學作品出版。有心欲從事台灣文學創作、欣賞个朋友，應該愛好好仔來了解學習--一下，有好無䆀[bái]啦。以後聽著啥乜心適个台灣俗語、諺語[gān-gí]，嘛攏有法度精確記錄落來，毋免閣用華文抑是ㄅㄆㄇ來烏白鬥。
Comments powered by Disqus.