黃越綏女士教我兩句台灣俗語

昨昏暗黃越綏[Ua̍t-sui]女士有去上「新聞挖哇哇」節目，我聽伊講話，學著兩句台灣俗語：

欲死 死毋成，毋死 天註定 [Beh sí# sí m̄ tsiânn#, m̄ sí# thinn# tsù-tiānn#]。我个解說：即句話差不多像華語講〔打不死的蟑螂〕咧形容一个儂真韌命、儼硬[giám-ngē]。台語按呢講卡濟字，但是嘛卡雅氣。

「台灣啥乜神攏會用得拜，干那三種神毋通拜－－𡳞神、悾神、大面神 [lān-sîn、khong-sîn、tuā-bīn-sîn]。」

「𡳞神 lān-sîn」是粗魯話，罵儂態度無正經、輕浮。阮遐个婦人儂會將伊「淨化」，講做 gān-sîn，來罵囡仔，卡袂遐歹聽。

「悾神 khong-sîn」是「普遍級」个話，罵儂無頭腦、真悾歁[khong-khám]。

「大面神」是普遍級个話，責備儂，特別是咧講查某囡仔，大範[pān]了過頭去，袂曉通見笑。以早保守社會，女性若大膽示愛，會予儂笑講大面神。

台語三字个「〇〇神」形容詞，足豐富、足心適，我捌寫過一篇〈台灣神，真伍仁〉，列位有閒罔參考。