久無來

足久無來寫物件，對四方好朋真誠失禮。雖然我閣有塊學練台語，毋閣袂記得个卡儕過學椆腹个，誠害。古早儂塊比並[phīng]講開[khai]个大大儕過趁个，有一句話，「閹雞抾[khioh]碎米，水牛落[làu]大屎」，我塊學台語嘛是按呢。

即學期開始教一科「中台即時口譯」，下禮拜開始上，有儕少做寡準備，總是想著足艱難。一--來是我家治工夫無夠，「hâm-bān師傅lám小工」，誤人子弟真iàn氣。二--來是現今多數儂有塊講个「現代台語」已經毋是十全[tsn̂g]个語言，卜對華語譯做即種台語，蓋食力。親像【燴飯】即種料理，佮卡早个羮飯略仔各樣[koh-iūnn]，有个店兩種攏有賣，汝卜食【燴飯】干那會使講華語，無，恐驚是棕蓑胡蠅，食毛[môo]。時世變做真儕日常用語，一般儂無論老tsínn，攏慣勢講華語，有个一直無相當个台語；有个舊底著有，毋閣已經失傳；有个有新台語詞，毋閣無時行。

我做一个台語老師，按怎擔帶[tam-tài]台語个運命？