96年全國語文競賽閩南語朗讀

足久無來更新網誌，歹勢。最近指導兩个學生參加96年全國語文競賽閩南語朗讀，得著頭名佮二名，師生攏不止歡喜。俗語講，有狀元學生，無狀元先生；我講，毋是老師共姻牽成，是學生家治才情。訓練佮比賽个過程，我嘛有學著物件。古早儂言「師tô徒，徒tô師」，亦著是「教、學相長[Kàu, ha̍k siong tióng]」个意思。

總是，現時台灣儂台語程度个退化，咱攏看現現，包括教育部頒佈个台語文件个整理者、比賽个評審、參賽个學生。

教育部所整理个朗讀稿，內底有袂少錯誤，特別是真儕音標注錯，看會出來毋是錯版，是改寫、注音个儂失稽考。可比有一篇「台灣像海翁」，內底有「東海長鯨」四字，原作無注音，整理稿佇「鯨」--字注做kiann。若是「京」有文音king，白音kiann兩音，但是「鯨」根本to無kiann的音，干那king佮khîng兩音。閣有「歸東即逝」个「逝」伊注做sè第三聲，即字是第七聲，毋是第三聲，「世」--字毋才是第三聲。我共我指導个學生講正音是啥乜，但是既然標準文件是按呢，比賽个時堅持唸正音，拄著不通个評審，講汝無照稿唸，共汝扣分，加[ke]衰个，只好綴伊錯落去。

比賽了，聽著評審塊講評，伊講了不止頂真，總是，有幾字仔呼音，著=个煞予伊當做毋著=个。口語「雞啼[ke# thî]」伊講愛唸做「雞啼[thê]」。

來參加全國賽大專組个學生，扑算有三份一以上，基本的台語呼音有問題，親像簡單的入聲字入聲無出來。

簡單寫到遮。