短片成癮
有佇我面冊動態寫一篇關係短片成癮[sîng-ún]个困擾：
阿元：我面冊个朋友已經超過四千个。過去佇面冊首頁，除了面友个動態， 閣會插廣告，面冊需要廣告收入，這我會使理解。
毋過面冊可能是驚我資訊量吸收了無夠个款，最近定定閣插一種 「連續短片與短片」，攏用媠姑娘个影片，唌我點入去看， 美女看了閣有古錐動物，一段看過一段，三更暝半，看毋知煞，真害！
阿如：豬哥元毋才按呢！汝个根底面冊攏知知咧！
阿元：「看著雞母𤆬雞仔囝，儂阮嘛有想欲做好囝。啊！人生算來海海–仔！」
（註：這是葉啟田〈三年前个我〉歌內个口白，作詞作曲者是呂金守）畫面採用手機仔寸尺个個人短片會時行，是中國个「抖音」（中國國內版） 佮伊个國際版 TikTok 先做起來个，「抖音」2016年成立，TikTok 2017 年成立， 短短幾年 TikTok 就成做世界上大个影音平台，甚至超過 Google，變做上有人氣个網站。 來自美國个 Facebook 佮 Youtube 當然毋甘願，也綴咧捒[sak]即種短片。 Facebook 佮 Youtube 个短片，真濟嘛攏是對 TikTok 來个。 中國个大外宣已經有真大个成果矣！
學習台語
關係地名个字、音脫節，洪惟仁老師有來面冊賜教，提出三種類型，我有閣補充一種。 另外佇本新站貼做一篇。
另外鋪一篇〈台語 oo-tō 个漢字是「烏道」抑是「污道」？〉。
學習日語
看一屑仔 JapanesePod101.
學習電腦
看一屑仔 Learning Perl 6.
生活記事
昨昏暗欲洗衫，發現洗衫機咧用迄个插座頂面个指示燈一直 sih紅燈。 迄个插座我已經換過幾若遍矣！是用美國个防漏電高級插座，彼內底有電子線路， 擋袂久，tann 閣故障矣。
今仔日早起个時間，大部份攏咧換即个插座。試我所剩[sīn]兩个 Leviton GFCI 插座， 會記得其中有一个閣會用得，結果兩个攏袂正常過電矣！後來換用台灣製个過載保護插座， 簡單鬥一下就完成。
台灣學日本个插座後壁个線空个設計，剝皮過个線直接插入去就椆咧，免閣鎖螺絲， 美國插座就愛閣鎖螺絲來固定電線。
迄粒過載保護插座，當然也有包電子零件，而且後壁面做甲特別大bong， 我幾年前欲換樓頂个插座，干焦欲共伊 tsinn入去接線盒仔，就創甲艱苦-tsē-kuà。 舊型个接線盒仔生鉎-liù-pí，強欲碎去；有个是鎖耳斷去；有个內底閣椆足濟紅毛塗屎， 尤其是洗衫機迄个插座。
佳哉當時 tsām-mo̍oh儂 我，有用足濟工，提鏨仔沓沓仔共 boo-kú-suh(box、接線盒) 內底个空間清出來，即擺才有通遮輕可。
Comments powered by Disqus.