關係「台語正音」，有真濟層面[tsân-bīn]，可比講：
一、上基本个是基本音韻系統个呼音，親像汝若一切 g 聲母攏無--去，像「五箍 gōo-khoo」講做「芋箍 ōo-khoo」；「牛肉 gû-bah」，講做「有吧 ū--pah」。閣有 am 全部變做 ang，像「澹澹 tâm-tâm」講做「銅銅 tâng-tâng」、「暗時 àm-sî」變做「甕時 àng-sî」。這種台語無及格，絕對愛正音。
二、有个是基本發音會曉，像 g 聲母、am 韻母攏唸會出來，但是有一寡個別个字，分袂清楚咁有 g；分袂清楚是 am 抑是 an / ang。即種个，原則上著愛針對袂曉个字，加強訓練。
即種層次个正音，有一个問題，就是有个字，一開始是少數儂唸毋著个「走音」，漸漸愈來愈濟儂攏按呢講，變做「俗音」，閣有一工，變做絕大多數儂攏按呢講，伊甚至會對「俗音」變做「正音」。像「我 guá」，閣二十年後，正音應該會變做 uá（設使台語無亡去）。
總是，佇現階段，因為這是日常基本語詞，阮台語老師猶原會凍大聲強調「正音」。
三、漢字台語音个正音層次。這非常歹剃頭。漢字數量濟、字體雜，有个走音，已經成百年，像「技 kī」唸做「枝 ki」个音，「技術 kī-su̍t」唸做「枝術 ki-su̍t」，即種走音，嘛算做是「正音」矣。少年儂受華語音拖累，唸做「記術 kì-su̍t」，老大儂就會叫伊愛講「枝術 ki-su̍t」。
六十年來，台灣儂一直吸收華語詞，但是一般儂連台語有幾調嘛毋知，閣卡無可能接受台語文个正式教育，來正確用台語唸出遮个華語詞，抑是書面語。最近幾年，台語教育有淡薄仔改善，但是閣差理想真遠。連台語文老師，肯逐工骨力查字典、研究台語正音个，恐驚足少。眾儂相趁相喊[sann-thàn sann-hán]，儂按怎唸就綴儂按怎唸，咁毋是卡簡單？
像「與」，即字若無考慮腔口，用伊佇台灣卡通行个 u 韻母（台北腔、台南腔攏是）个講法來論，有三種聲調：
一、第二聲（上聲）ú（華語上聲 ㄩˇ），這是「佮 kah/kap」个意思，做介詞。像「與人為善 ú jîn uî siān」、「與世無爭 ú sè bû tsing」。
ú 另外也有做動詞用，「予[hōo]、贈送」个意思。古文其他意思閣足濟，遮無列。
二、第七聲（陽去）ū（華語去聲 ㄩˋ），這是「參加」个意思，做動詞，親像「與會 ū-huē」、「與聞其事 ū bûn kî sū」。
三、第五聲（陽平）û（華語陽平 ㄩˊ），古文疑問句尾詞，佮「歟」相通。
按呢列出來了後，咱就知影，書面語「參與」个台語正音是頂面个第二條 tsham-ū，毋是 tsham-ú；華語正音是 ㄘㄢ ㄩˋ，毋是 ㄘㄢ ㄩˇ。
「參與」，會曉華語正音个儂算真普遍，而且汝愛唸正音，比賽考試才袂予儂扣分；但是會曉台語正音个，一萬个，揣無一个。連台語文評審嘛講 tsham-ú 才著，講伊干焦聽過 tsham-ú 个講法。所以我訓練學生參加台語朗讀、演講比賽，嘛只好叫伊唸 tsham-ú，毋敢叫伊唸正音 tshām-ū。若無，戇戇堅持評審嘛毋捌个啥乜碗糕正音，結局予儂扑落來，無著[tio̍h]名，咁無足衰？
總是，根據我家治个稽考[khe-khó]，佮我个漢文先生明確所指出，「參與」个「與」是第七聲，毋是第二聲。
Comments powered by Disqus.