雖然我台文創作个經驗真淺薄，毋過，兩年外逐工佇 Facebook 寫台語，漸漸我也體會著，佇網路寫作、推捒台語文，愛有策略[tshik-lio̍k]：
著愛看款媒介、主題、讀者、動機，來調整台語文个用詞、語法、漢字、標音、排版（包括分段、標點）、長度、深度。一方面顧慮現實，設法予無學過台文个讀者好理解，歡喜來接受我提供个台語智識，抑是我對時勢个看法；一方面也追求我心目中，對「美好个台語文」个一套理想。
一兼二顧，雖然袂凍兩全其美，漸漸也有見著功效。我交陪著一寡過去無機會相捌，但是平平關心台灣文化，南北二路个新朋友，影響怹主動來學寫台語文。
我知影全部羅馬字（白話字）个台文，現時佇台灣个社群網站袂興[hing]，無法度引起一般民眾對台文个關心。所以我佇 Facebook 是寫漢字為主个台文。
但是我也非常保惜白話字對保存原味个台語，價值重大，所以就成立 fb 个專門社團，招集有白話字基礎个友志，透過視訊聚會，來相佮[sann-kap]探討寶貴个台語舊文獻。
以上毋是咧請功，只是為家己慢慢仔行過个小坎站，留一段記錄。此去，欲按怎把握時間、勤讀深造[tshim-tshò]，來予我个台文閣較開闊、有內涵？這對我是一項大挑戰。
關係書寫網路台文个策略，進一步說明：
看款「媒介、主題、讀者、動機」，來調整「用詞、用字（漢／羅）、句法、音標、長度、深度、排版（包括分段、標點）」。舉例：
- 媒介：像 Facebook 適合即時、淺白、清爽个短篇台文，特別愛注意分段，一段五行以內，加用一寡標點，話句切予短，勿用複雜个句式、囉嗦个講法，段落間愛加一行空白。 若是 blog，就會用得較長篇、較深入。
- 主題／動機：像政治、社會運動个議題，台文寫較淺咧，有理性，也有熱情，倯[sông] 無要緊。若是文化、文藝、個人心情个主題，會使寫較曲折[khiok-tsiat]、有深度个句法、語詞、俗語、比喻、典故，佇文尾適當加寡註解。
- 讀者：對象若針對台文界友志、台語系學生，就寫較深，用較濟羅馬字、台語特色詞、古早話；若欲予社會大眾看，就寫較淺，用較濟漢字、台華通用詞、現代話。
- 四句聯文學創作，完整標音。雜文有必要个所在才標音。
另外，有台文先進足感心，先寫台語文，才閣附華文對譯，方便會曉講台語，但是袂曉讀寫台文个朋友，透過對照，漸漸熟似台文。我無按呢做，一方面是各儂所面對个讀者群無仝，一方面我會煩惱[ló] 讀者無法度脫離對華文个依賴性。
其他閣有濟濟考慮、鋩角[mê-kak]，大目標是向望會得兼顧「傳播智識、溝通理念；鼓舞民眾關心、佮意正宗台語文；提昇讀者个台語、台文程度」。
已經推捒三十年个現代台語文運動，到今猶未出現《實戰台文》、《台文讀寫錦囊》、《實用台文寫作指南》、《台文讀寫大全》、《台語文按呢寫就著啦！》、《第一擺寫台語就上手[tsiūnn-tshiú]》即種冊。咱一向足愛相諍符號層次个「全漢、漢羅、全羅」欲用佗一種，羅馬字內底閣有「教羅、台羅、通用」等等派別，台文界友志長期佇椆內相觸[tiâu-lāi sio-tak]袂煞。咱著冗早超越即種層次，進入「實務台文、文體台文」个研究佮應用階段。
最後，欲托透江湖一點訣：佇台語散文、雜文內底，配插四句聯，有畫龍點眼[gán]个效果。
以上予恁罔參考，隨儂發揮上蓋好。
珍惜母語著捌寶，聽講讀寫無潦草[ló-tshó]。
Comments powered by Disqus.