佇日本機場入關个小事件

咱台灣儂佇日本機場个海關捌發生過一項小事件：

怹入境通關辦手續个櫃台，是設計做兩个櫃台相連，櫃台个雙爿攏有入口。對欲入境个旅客个角度來看，正爿个櫃台有設通行欄杆，引𤆬旅客辦好手續了後，就踅對櫃台个正手爿入境；抑倒爿櫃台所設个欄杆，就是欲予旅客踅對櫃台个倒手爿入境。

伊無畫箭頭指示方向，但是佇正爿辦手續好勢，就踅櫃台个正爿邊入境；若佇倒爿辦手續，就踅倒爿邊入境，應該是逐家攏感覺真自然、四序个動線。

咱台灣捌有一團去日本觀光，團員多數是中少年儂，獨獨有一个老阿婆綴序細來𨑨迌，入口个時，排頭前个少年儂，真順利完成通關入去，到甲阿婆--仔，倒爿櫃台海關人員辦好將護照還伊了後，伊煞用一種真無自然个姿勢，踅一大輾[liàn]，對徛佇正爿櫃台个團員身軀後過去，硬欲櫼[tsinn]對正爿入口。

日本海關人員較猛[khah-mé]徛起來，緊張个面腔、比手畫刀，愛伊行倒退，重踅轉來倒爿入口。佇後壁等待个團員也著一驚，huah阿婆叫伊重行。

迄兩个入口照看無設電子感應設備，平平攏是入口通路，佮佇佗一个櫃台辦手續，實際是無關係。團員眾儂佇咧會，講日本儂做代誌足頂真，事事照步來，雖罔實際無差，若無照一定个程序來行，怹就無法度接受。

在我看，阿婆毋是毋捌世事、無明理，伊个行為只是反映咱舊早千百年來唐儂[Tn̂g-lâng]个文化習慣：「入龍喉、出虎口」，無論是進入廟宇、機關抑是啥乜大塊厝，攏愛對「龍爿 lîng/liông-pîng（也叫「大爿 tuā-pîng」）行入去，後來才對「虎爿 hóo-pîng」（小爿 sió-pîng）行出來，袂使對反，若無，就是「破格 phuà-keh」，歹吉兆。

龍爿是對建築物正身个觀點看出去个倒手爿（若是坐北向南个厝，龍爿就是佇東爿），但是對咱欲行入去个儂來看，龍爿就是佇咱个正手爿。抑虎爿就是建築物看出去个正爿，也就是咱欲入去所看著个倒手爿。

即个阿婆慣勢行龍爿進入一个所在，實在是「唐儂文化」个因素啦。我毋知日本古早有學即種風例--無，不而過，現拄現，現代日本並無即種文化。