升級 iMac 記憶體佮作業系統

目前 Mac OS X 10 (Yosemite) 發行第二擺个小調整 10.10.2。我進前聽儂講 升級Yosemite 了後字體變較霧（除非是用高貴个 Retina 螢幕才會媠閣清），所以我無啥敢升級。

最近，我學著 Mac 系統个袂少撇步，知影會使得將新版个作業系統裝蹛外接个 há-ti（硬碟）來試用，試了若滿意，才正式將內接个 há-ti 換做新版。

若是汝有 USB3 / Firewire 800 / Thunderbolt 即幾種介面个外接há-ti，就通好試，若是 USB2 就較無適合，因為速度傷慢。

即兩工，我上露天拍賣，買著一條 DDR2 800 4G 个記憶體，我原本有裝 2G+2G=4G，將其中一條換做 4G，就變成 2G+4G=6G，加出 2G 个記憶體好用。這是 Early 2008 iMac 事實會使弓[king]到上大个程度（雖然官方是講上大到 4G），但是 iMac 真gâu揀記憶體，略仔品質較差个，就袂用得。好得佳哉我買即條二手貨，不止勇，我開機 command+s 入去單人模式(single-user mode)，執行：

memtest all 3 -L

完整測試三擺，攏 OK。(memtest 程式愛另外去掠)

就想講，趁即个測試擴充記憶體个機會，來裝 Yosemite，一方面試看買來个 SDRAM 會堪得走新版个作業系統袂，一方面試看 Yosemite 好用無。我就用 Firewire 800 个外接há-ti 將 Yosemite 裝起來，發現真正有寡字體傷細字、傷霧，調來調去，攏調袂好勢。所以目前猶原繼續用舊版 10.9.5 Mavericks 个作業系統。

新世代个 Mac 對視力無好、老歲仔目个儂來講，無友善，蓋濟所在預設个字體攏傷細字，原裝个 Apple 系統軟體，容允用者調整个所在蓋少，愛另外去揣別儂寫个調整軟體，真厚工。即種趨勢[tshu-sè]，到 Yosemite 愈傷重，遠看真媠，近看傷目。