台語否定詞 mài，教育部kah儂著寫「莫」。決定採用即字个專家扑算毋知影台語另外有 boh8 即个否定詞。bo̍h 才是「莫 bo̍k」个白話音，像「莫得講[bo̍h-tit/teh kóng]」是 mài講；「莫應 bo̍h-ìng」是毋通、不應該；轉接詞「莫講、莫講卻[kioh]」是華語「莫說、何況說」；「kah伊莫[boh8]」是華語「叫他別」，這台語也講「kah伊mài」。
"bo̍h" 現代台語儂已經真生疏，一旦閣借用「莫」來寫目前卡常用个 mài，煞害 bo̍h 無漢字好寫，提早hông宣佈死亡，慘喔！
日本時代佇廈門會文書局出版个歌仔冊「最新失德了歌」。講一个查埔予無翁个 飼金魚，朋友知影，共伊恥笑，伊就應講「有錢通(thang)用第一好，別儂那(nā)笑甲伊物(莫)，汝也退(替)我袋(teh)煩惱，我有恰(khah)營(贏)汝塊(teh)無。」
「甲伊物」應該唸 "kah i bo̍h" 才有鬥句，本意是「叫伊毋通」，但是口氣上是欲表達講，我是希望怹毋通按呢，但是伊若正實欲按呢，據在伊啦，即爿也無咧掣[tshuah]啦！。伊印做「物」是凊彩借用个，正確个漢字是「莫」。
迄本歌仔冊，咱看會著，上早个版本寫「甲伊物」，一種合理个猜測是，原作者是訓用「勿」來唸做 boh8，但是傳抄刻版个儂毋捌，煞生出牛字爿，變成無相干个「物」字。嘛有可能是，初初个刻版者掠叫是作者欲講攑家私扑儂迄種bu̍t，所以改做挑手爿个「𢪱」，後來再版，又閣加生出一撇，才變成「物」。設使作者本來就是寫「物」，欲叫儂讀做bo̍h，按呢只好按呢解說：「物」=>「勿」=>「莫」。「物」經過同音借用，轉做「勿」；「勿」閣經過訓用，轉做「莫」，最後咱才唸會出正確个bo̍h个音，只有"bo̍h"佇即葩七字仔內底，才有鬥句。
寫「甲伊物」，欲叫儂唸 kah i bo̍h，毋但是咱現代台語儂僫讀，連提會文堂版來改个榮文社、宏文社、周協隆个編者嘛花花，比較：
會文堂(年代不詳)：別人那笑甲伊物
榮文社版(1928)： 別人那笑咱概物
宏文社版(1932)：別人那笑甲伊無
周協隆(1932、1937)：別人那笑甲伊無
即種用字法傷過ih-uat，實在不可取。
以上，敬請先進指正，感謝。
施炳華教授來賜教：『莫音boh8，佇南管是定定出現。』感謝伊。按呢扑算施教授也佮我同感，無贊成教育部用「莫」來寫 mài。目前我是沿用以早洪惟仁教授个寫法，將"mài"寫做「勿」，保留「莫」予伊个白話音bo̍h，無愛將「莫」來訓用"mài"。
Comments powered by Disqus.