台語唸春聯古錐動畫之一（附台羅字幕）

新年頭、舊年尾，咱來請一寡古錐个動物講台語唸春聯予咱聽。

敬祝貴君新年快樂年年春。

會曉用台語文言音讀古文个儂愈來愈少，親像唸春聯，著愛用台語來讀，平仄[piânn-tseh]才會準確。

所用个腔口是漳泉濫優勢腔，像「勤 khîn、與 í」唸漳腔，「處 tshú」唸廈腔。變調个法度，有考慮「生語、熟語」个差別。親像「福祿壽」「天地人」較熟，已經詞彙化，成做一个詞來處理，所以前兩字唸變調，尾字才唸本調。若是「松竹梅」「桃李杏」較生，我佇遮攏共伊當做並列詞組，三字分開唸本調。即種法度毋是絕對个，「松竹梅」也會用得當做一个三字詞來用，台日大辭典有收，伊所記前兩字是唸變調。

台羅字幕出現个 # 號，是指示前字愛唸本調。每一句个尾字正常攏是本調，所以無特別佇句尾標記 # 號。

所用迄套 Talking Friends 動畫軟體是簡單个𨑨迌物仔爾爾，所以做袂到喙形佮發音完全配合，而且聲音予伊自動處理過了後，也加減會影響著呼音个正確度，所以著愛以所附个台羅字幕為準。請多多包涵。

影片製作：潘科元（版權所有）
春聯圖框：鄭惠敏
感謝鄭小姐費神幫贈。