台語地名「水碓仔」[Tsuí-tuì-á]

昨昏去參加台灣文化書局所辦个台語歌謠分享會，請張啟文老師來說唱[suat-tshiùnn]，有夠精彩！伊除了唱一寡出名个台語老歌，最後嘛有表演伊家治个創作，唱出伊對鄉土个深情厚愛。有提起台中南屯[Lâm-tūn]一个庄頭，漢字寫做「水碓仔」，台語音是 "Tsuí-tuì-á"，tuì 第三聲，拄著 á，特殊變調，變做第一聲。當時在座，有先進講，正音應該是 Tsuí-tuī 个 tuī，拄著 á，變調猶原是第七聲。

若是照我想，台灣用「水碓[tsuí-tuì]」來做地號名个所在毋但一tah，會按呢號，大常[tāi-siông]攏是迄所在，有設一座創水力帶動个「石碓」[tsio̍h-tuì]，代替人力來舂米[tsing-bí]，這愛有資本，嘛愛地理條件有配合才設會起來。到甲日本時代，引進機械化[ki-haî-huà]个「米絞」[bí-ká]（即馬華語叫做【碾米廠】），傳統个「舂臼「tsing-khū]」、「塗礱[thôo-lâng]」、「水碓[tsuí-tuì]」著隨个仔隨个淘汰[tô-thài]去矣。「水碓」个正確呼音一般台灣儂亦毋知矣。

舂臼「舂米[tsing-bí]」、塗礱「挨米[e-bí]」、米絞「絞米[ká-bí]」，對應个動詞愛用無共字眼，總是，目的差不多，攏是欲共粟仔[tshik-á]个外殼佮內底个米分開。外殼是糠[khng]，粗个是粗糠[tshoo-khng]，thang燃火[hiânn-hué]，抑是濫落去「印塗墼」[ìn thôo-kat]起厝；幼个是米糠[bí-khng]通tshiau料 飼豬飼雞。毋閣「碓」咁有做動詞用，講「碓米」，這我著毋知矣，請前輩指教。

「水碓」唸做 tsuí-tuì，名詞「碓」是第三聲，1873年廈英大辭典、1931年台日大辭典攏有收即个詞，古早韻書注「碓」个音：「都內切，音對」，「碓」本來著是陰去聲，台語自古相傳唸 tuì 無錯。台語第三聲後壁若接「仔」，毋是一般變調變第二聲，是變第一聲，所以，「水碓仔」个碓變第一聲亦是完全正確个，台中「水碓仔」在地儂並無講了走音去。「水碓[tsuí-tuì]」，毋是欲講「墜--落去」个意思，所以毋是「水墜[tsuí-tuī]」。

台日大辭典所收个台語詞，除去「水碓」，有「碓」个閣有一、 二十个：親像：米碓[bí-tuì]、舂碓[tsing-tuì]、手碓[tshiú-tuì]、石碓[tsio̍h-tuì]、石碓頭[tsio̍h-tuì-thâu]、狗踏碓[káu-ta̍h-tuì]（俗語：教狗亦會踏碓）、跤碓[kha-tuì]（漢字伊寫做腳碓）、lap-tuì、踏碓[ta̍h-tuì]、碓臼[tuì-khū]、碓身[tuì-sin]、碓頭[tuì-thâu]。