台語字姓文白音个使用

本文

簡單舉例討論台語字姓文白音个使用（台語講「字姓」就是指「姓氏」）：

每一个字姓佇日常應用个台語習慣唸法攏無一定，愛分開看待，毋是一律選白話音，或者是一律選文言音，也毋是講兩種音攏著，煞隨意選用來稱呼對方，按呢會引起對方大不滿，造成溝通失敗。

一、台語真濟字姓一律唸白話音，像「潘 phuann、陳 tân、蔡 tshuà、曾 tsan、柯 kua、邱 khu、石 tsio̍h、楊 iûnn/iônn、鄭 tēnn/tīnn、侯 hâu」，袂使唸做文言音 phuan、tîn、tshài、kho、khiu、si̍k、iông、tīng、hiô/hôo。

除非是咧讀古文，像史記「陳平世家」，毋是唸 Tân Pîng sè-ka，是唸 Tîn Pîng sè-ka。孔子个學生「曾子」愛唸 Tsing-tsú，毋是 Tsan-tsú。

二、有个字姓無分文白，只有一音，像「李 lí、杜 tōo、朱 tsu、辛 sin、古 kóo」

（有儂主張 ku-kuài 即个詞个 ku 就是「古」字，這到底有正確無，愛閣稽考，請毋通牽對即款特例來討論。）

三、有个字姓，古早慣勢唸白話音，現代慣勢改唸文言音，像：

「何」：古早有講 uâ，但是當今台灣差不多攏講 hô。我問過姓「何」个儂，伊根本毋知即字有唸 uâ。「何」唸 uâ 目前唯一保留佇「無奈何」即个詞个白話音 bô tāi/tā/ta-uâ，但是多數儂也袂曉得，講做 bô nāi-hô 矣。

「蕭」：有儂堅持怹姓 sio（唸白話音，像台語文界前輩蕭藤村老師），有儂堅持怹姓 siau（唸文言音，像台語文界前輩蕭平治老師），這咱著愛尊重本儂，咱毋通隨意稱呼。（2023-10-24補註：嘉義Siau老師有講，𪜶佮姓Siau=个無仝宗。社頭Siau老師講，伊無確定𪜶个祖先是毋是對福建來个。我咧想講毋知社頭上大姓个「蕭」是毋是清朝「賜姓」來个？畢竟「社頭」本底是平埔庄社。）

「翁、汪」：即兩个姓本來應該攏是唸白話音 ang，但是有愈來愈濟儂唸做 ong。

「孫」：即个字姓古早唸白話音 sng，但是古冊人物「孫悟空」一向是唸文言音 sun。現代可能是受著「孫悟空」个影響，而且「孫仔、囝孫」攏唸 sun，華語音嘛是ㄙㄨㄣ，所以當今台語儂即个字姓攏改唸 sun，像「孫中山 Sun Tiong-san」。但是阮老爸提起「孫立人」，是唸古早音 Sng Li̍p-jîn，伊當年入伍，就是佇孫立人將軍來台灣所建立个部隊。

「唐」：本來是講姓 tn̂g，白話音，阮屏東日本時代大好額儂「唐榮 Tn̂g Îng」也有儂唸做 Thn̂g Îng。若現代就多數儂慣勢講姓 tông，包括出名个歌仔戲演員「唐美雲」也自稱伊是 Tông Bí-hûn。

「馬」：佇古早有唸白話音 bé（是毋是足普遍，我就毋知），像三伯英台故事个「馬俊 Bé Tsùn」，但是現代儂攏慣勢唸文言音 má，已經毋捌聽過姓「馬」个儂自稱伊姓 bé，所以咱著尊重怹，叫伊 Má--先生，Má小姐。

馬英九毋是台語儂，但是伊个台語老師教伊唸「我姓 Má」，毋是「我姓 Bé」。真濟儂叫伊 bé ing-káu，這有罵伊个用意，毋是正經稱呼，準做汝堅持汝按呢講，並無歹意，在姓「馬」个儂聽起來，也會感覺受侮辱。這毋是理想个人際溝通。

---

面冊網誌留言

Lîm Sekiông
史記「陳平世家」，毋是唸 Tân Pîng sè-ka，是唸 Tîn Pîng sè-ka。孔子个學生「曾子」愛唸 Tsing-tsú，毋是 Tsan-tsú。(如何知道這要念 Tîn & Tsing?)

潘科元
Lim 牧師，平安。照台語傳統，讀古文一律用文言音，文言音查甘字典，伊用第一字母大寫標明。Tîn Pîng sè-ka、Tsing-tsú 若有跟過漢文先生讀古文，就知影確實是按呢傳承。若是無機會跟先生讀，也有白話字《新撰三字經白話注解》好參考印證：

新撰三字經白話注解

Lîm Sekiông
🙂