台語詞「主張」

本文

台語詞「主張」，上少有四種意思、用法：

1. 「看法、意見」，干焦會用得做名詞。
2. 「認為」，干焦會用得做動詞。
3. 「主張」，也會使做動詞，也會使做名詞。
4. 「相信」本質上是動詞，但是有時會使得轉做「動名詞」。

台日大辭典(1931) 有收「意見、主張、相信」，無收「看法、認為」（即兩个詞應該是台語吸收華語來个）。伊對「主張 tsú-tiunn」个解說真心適：

第一个解說是：「家己判斷、思考、考慮」，例句（照伊个漢字）：「一人主張，不值二人思量。」[tsi̍t lâng tsú-tiunn, m̄-ta̍t nn̄g lâng su-niû]；

第二个解說是：「(國) 主張、提出意見。」（「國」是指日語）

但是伊閣收唸文言音个「主張 tsú-tiong」，即个詞條，只有「(國)主張」个解說。

這真趣味，傳統个白話音 tsú-tiunn 拄著日語个「主張」，當時有儂用白話音唸法來擴充包含新意義，有儂就唸文言音 tsú-tiong 來表示新意義，佮白話音个唸法，意義有區別，可惜即種幼路个講究，咱早就無採用，攏是唸 tsú-tiunn，而且舊意義強強欲無--去矣。

按呢看起來，無論華語、台語，目前咱若用著「主張」，通常是學日語个意思。

李登輝先生1999年出版《台灣的主張》，今年2015閣出版《新．台灣的主張》。以前阮个漢文先生講，「台灣的主張」（Tâi-uân tik tsú-tiang）無通[thong]，因為台灣毋是儂，欲按怎有主張？我毋知這欲算是李先生一種比喻修辭法，抑是若照日文个語詞配搭(collocation)，講「台湾の主張(しゅちょう)」是真四常个用法？

---

面冊網誌留言

Lîm Sekiông
說動名詞，其實我發現滚有完成式的說法!

黃建盛
台灣，除了是地理名詞，當變做「邦國、國家」來使用，就開始有「位格」，類似「法人」。這種按歐洲發展出來个現代新閣卡幼路个觀念，當然用咱話傳統个語法來看會卡怪，卻是另外一款有價值个創新。

潘科元
有影！