「國語禮拜堂」

我去查維基「台灣基督教」，發現「國語禮拜堂」也是台灣基督教一个主要个「派別」。啥？這也算一派？伊成做一个派別个中心思想是啥？

後來閣連過去「濟南基督長老教會」，看著中國黨來台灣，將儂民間基督長老會个資產劫收過去當做國有，閣轉送予中國來个基督徒將官，才有「國語禮拜堂」。但是原來个長老會予伊趕無走，煞變成一間教會有兩塊招牌： 「財團法人台北市 濟南基督長老教會」、「基督教會 台北國語禮拜堂」

即群「趕廟公个乞食」有一个特色，就是無論怹佇台灣蹛偌久，嘛袂對台灣个文化古蹟有感情，怹干焦會數念𤆬怹來台灣个　蔣公。

解嚴了後，國語禮拜堂想欲將即棟古雅个建築拆掉，改建十二棧个大樓，而且欲號做「蔣公紀念禮拜堂」。爭議足久，1998年才公告做古蹟，保留落來。

咱看「國語禮拜堂」董事長林丕鴻所寫个「國語禮拜堂簡介」其中一段：

『民國三十八年，台灣長老教會為發展教會組織，要求與國語禮拜堂共同使用教會正堂，國語禮拜堂，鑒於長老會同為宣揚基督福音之組織，多一教會，對基督福音之傳播，更多有利，經禱告考慮後，欣然接受，三十九年九月十二日，是長老會濟南路教會成立，兩教會約定，禮拜日上午九點半至十點半為台語禮拜，十點半以後為國語禮拜。』

搶剝儂个錢財了後，提淡薄仔出來予受害者，煞講是咧做慈善，咁袂傷惡質？袂啦，這就是中國黨仁民愛物个本質啦！

有兩塊招牌个濟南教會：