查白話字教會公報來確定「名著」个台語音

寶貴个白話字教會公報資料庫

出名个著作[tù-tsok]書面詞是「名著」，這毋是生活口語，台語按怎唸？ 若攏欲講口語，就講「出名个冊」。

按呢咁袂使照「名著」兩字去唸？可以！
問題是「名」有文白音，是欲唸 miâ-tù 抑 bîng-tù？

網路辭典个「名著」台語音？

咱若去查「揣台語」網站，就發現其中唯一有收即个詞个台語詞庫就是「台華線頂辭典」， 標 miâ-tù。

不而過，即種音我一下聽就感覺 koh樣，我認為無值得採用。因為【著 tù】是文言字眼， 配白話音 miâ 來組詞，蓋礙虐。

教會公報个「名著」台語音？

去查白話字教會公報資料庫，果然！有四篇文寫著 bêng-tù（教羅拼法）， 無半篇寫 miâ-tù。點入去看前後文，確定伊是咧指「名著」。四篇無仝作者个文章， 討論無仝主題个冊，攏有講著 bîng-tù，這通予咱採信，學用。

文語容易佇教會公報查著

這就是我再三再四強調，白話字教會公報个寶貴！雖然較土直的話佇教會公報查無， 像當今常用語 bē/bōe-sóng 就無出現過，但是像 bîng-tù 即種較文个詞來查教會公報往往就有。 不而過，因為公報攏寫白話字 （一半擺仔用著漢字，是做夾註爾爾），所以咱著盡量換用無仝个文白音、 漳泉腔來試，我用 mia5-tu3 落去查，無；用 beng5-tu3 就查有矣！

「名著、著作」正確台語音

「名著」著唸✅ bîng-tù（漳腔 bîng-tì、老泉腔 bîng-tìr），毋通唸❌miâ-tù 。

另外，我知影有袂少儂會照華語音ㄓㄨˋ來類推台語：「注、著」華語仝音， 伊也不知不覺叫是台語也仝音，既然「注」台語是 tsù，伊著半臆半信， 將「著作」講做 tsù-tsok，按呢也是欠學所致。

「著作」著唸✅ tù-tsok（漳腔 tì-tsok、老泉腔 tìr-tsok），毋通唸❌tsù-tsok 。

教會公報查詢系統接受兩套四種台語拼音來查

囥佇中研院網站个教會公報原文查詢系統，雖然介面素素，無啥奇巧个功能， 總是伊有一點真可取，就是無論咱用數字式白話字 beng5-tu3、數字式台羅 bing5-tu3、 調號式白話字 bêng-tù、調號式台羅 bîng-tù 落去查，攏查會著仝款結果， 伊回應呈現予咱个文本是原刊个調號式白話字（教會羅馬字）。

請點以下連結入去教會公報查詢系統：
白話字教會公報資料庫查詢系統