無合台語音个屏東縣地名漢字舉例

屏東縣地名漢字，無合在地儂實際台語發音舉例（括號原名个漢字，真濟是借音字）：

一、山地門（鄉），毋是 Suann-tē-mn̂g，是 Suann-ti-mn̂g（山豬門/毛，源頭是原民住民話）

二、萬巒（鄉，清代文獻寫「萬蠻」），毋是 Bān-luân，是 Bân-bân（蠻蠻，應該是原民名稱）。客話 van55 man33

三、車城（鄉），毋是 Tshia-siânn，是 Tshâ-siânn（柴城）。

四、佳佐（村，屬萬巒鄉），毋是 Ka-tsò，是 Ka-tsáu（加走，原民名稱）

五、力社（村，屬崁頂鄉），毋是 Li̍k-siā，是 Lē-siā（麗麗 Lē-lē、麗麗社 Lē-lē-siā，原民名稱）

六、廣安（村，屬萬丹鄉），毋是 Kóng-an，是 Kóng-kuann。古早名應該是 Kóng-uann，uann 是「安」个白話音，後來前字个 k- 聲母同化後字，才變 Kóng-kuann。

有友志 Tionn Tsì-sîng 先生來分享，伊寫講：『廣安，唸Kóng-kuann，情形佮我遇著的差不多。自細漢，我一直掠準阮兜東爿隔壁庄叫做東官寮，但是反地圖攏揣無，顛倒有一庄毋捌去過的一直佇地圖頂頭，懷疑出版社哪會一直拍毋著字，原來伊叫做「同安寮(tâng-uann-liâu)」(我真正是大漢了後，才佇討論台灣文化的BBS站，知影「同安」ài唸「tâng-uann」)。你若欲，佇網路頂拍「東官寮」就揣會著彼所在，一般人到今猶是攏烏白用。』

宜蘭冬山，台南白河，攏有「廣安」庄，才拜託蹛迄附近个友志，留言賜教，恁遐按怎唸「廣安」兩字？

福建閩南个「同安 Tâng-uann、南安 Lâm-uann、惠安 Huī-uann」攏是縣市級个大地頭，所以福建儂普遍知影「安」有 uann 个音。但是台灣舊地名有「安」字个，攏是庄社爾爾，其中iáu有足濟「同安寮、同安厝、同安村、同安里、同安路/街/巷、同安橋」，「寮、厝」即種名，表示迄所在古早有同安儂來遐開墾、居住。毋知目前當地儂是按怎唸个？