台灣有寡歹心烏漉肚个大生理儂，長期收 phun（ㄆㄨㄣ）製造食用油，販[huàn]出來予儂做餅、煮食，銷遍全國，tsiah久仔 夭壽代才出破，通台灣大驚。
華語詞〔餿水〕，台語講 phun，目前教育部推薦用字是「潘」。
「潘」佇先秦經典就有用，意思是洗米過个水，古早儂有用來洗頭。台語講「米-phun」个 phun 考證起來，起頭个本字確實就是「潘」--字無錯，但是台語單字詞 phun，早就普遍用佇引申義，特別指「儂食賰个飯菜佮油湯，通常攏抾規桶起來飼豬，臭酸味真重」。若欲講洗米水个本義，顛倒較慣勢講兩字詞「米-phun」。
「潘」佇春秋時代以後，閣用做字姓（來源是以儂名為姓、以國名為姓、漢化改姓各種原因），是百家姓在內，潘--氏囝孫生湠濟濟，是漢字文化圈重要个大字姓。應該就是因為按呢，古早儂才另外造一字「䊩」（米+番）來指原來「洗米水」个意思，這佇遼代釋行均个《龍龕手鑑》、金代韓孝彥个《篇海》兩部字典攏有收。「䊩」即字个存在，起碼有一千年个歷史，咱無應該閣復古轉去到先秦，抑是東漢《說文解字》寫法無分別个上古時代。「䊩」--字古早儂另外閣有創造一寡異體字，因為字形愈複雜、筆劃傷濟，無實用，佇遮免提起。
小弟姓「潘 Phuann」，毋是姓「䊩 phun」，於公於私，我攏強烈主張「潘 Phuann」佮「䊩 phun」愛分開寫！
教育部官方文件〈臺灣閩南語推薦用字700字表〉編號394：
「建議用字：潘。音讀：phun。對應華語：餿水、淘米水。用例：用潘飼豬、米潘。」
各位有注意--著--無？〔餿水〕个意思佮用例，攏列佇〔淘米水〕个頭前，這是反映現代台語一个語用事實：phun做〔餿水〕使用个頻率大大超過〔淘米水〕。『華語〔餿水〕，台語文就是「潘 phun」，飼豬咧用个』，按呢落去教，一定會害阮姓潘个學生予同學譬相[phì-siùnn]、蹧躂甲走無路。
理想上，咱愛有平正心，王陽明先生講「物各付物 bu̍t kok hù bu̍t」，咱無應該想歪去，也應該將即字个來龍去脈佇適當个階段教予咱个下一代。總是，細漢囡仔真活潑、有聯想力，所以也無禁無忌，雖然咱佇課堂上，機會教育學生心態愛平正，毋過下課後，姓潘个學生iáu是不管時就會予同學sau-phî講：〔ㄆㄨㄣ同學來了！ㄆㄨㄣ同學來了！〕、〔妳明明就是ㄆㄨㄣ！ㄆㄨㄣ小姐妳好。〕。尤其是即馬个台灣儂，無論年歲，攏慣勢唸華語音講姓名（連一寡台語新聞主播嘛按呢），同學之間無儂用台語音叫名，按呢「潘」字對怹來講，台語音煞只賰一个 phun。
〔潘 ㄆㄢ〕佇現代華語文完全用佇字姓（抑是地名等專有名詞），「潘」个造字本義華語白話文無咧用。台語日常話是普通名詞 phun 比專有名詞 Phuann 較捷用，但是 Phuann 是大姓，本來也攏足平常，即兩个音義完全無仝个物件，台語文煞攏寫做仝字「潘」，造成姓潘个囡仔莫明其妙予同學恥笑，無上台語課無代誌，上著台語課了後，煞變臭頭雞仔。請問，即个學生咁袂因為按呢來抾恨台語文帶予伊見笑、恥辱，煞tsua̋n永遠怨慼台語文？穩當會。
台語文已經有夠弱勢，已經長期予統治者抹烏，予台灣儂家己看衰䆀[sue-bái]。咱咁毋免用較大个體貼心，善巧方便个做法來予母語教學閣較圓滿？
台語漢字个選用，著愛多方面來考慮現代儂个使用心理，予教學、傳承會得通順利進行。毋是講揣出迄个上古源頭个本字，就直接提來用。
佇教育部電子報「臺灣閩南語按呢寫」第414期解說著 phun 寫「潘」个理由，伊有提起：
『因為「潘」字的音義都和 phun 符合，加上文獻中如《廈門音新字典》、《臺灣話大詞典》、《臺語語彙辭典》、《臺灣閩南語辭典》等，都把「淘米水」的 phun 寫成「潘」，所以本部以「潘」為 phun 的推薦用字。』
但是伊無提起重要文獻《臺日大辭典》是寫做「䊩」，伊也無提起《廈門音新字典》个 phun 是先列「䊩」做優先用字，才閣列「潘」做異體字。即份電子報最後一段閣寫講：
『有民眾認為，「潘」也是姓氏，用來當作「淘米水」的 phun，不太恰當，因此建議以「䊩」來取代「潘」。但因為「䊩」是新造的字，會造成學生學習負擔，所以還是採用本字的「潘」較為理想。』
「䊩」已經存在一千年，佇教育部台語委員个心目中，猶原是「新造」个字！這咁毋是中著「本字毒」？加學一字个寫法，看起來是「增加學習負擔」，但是兩个完全無仝呼音、無仝用途个詞素 phun 佮 phuann 煞寫做仝字，即種音佮字無平衡、一[it]字多音多義，所造成个學習負擔也無較細，甚至閣愈大。若閣加上頂面所提起，姓潘个學生會予同學恥笑伊是飼豬个 phun，來遭受著語言霸淩个精神折磨，致使對台語文反感、倒彈[tò-tuānn]，按呢採用「潘」來寫 phun 根本無較tshâng。
當然，真濟字姓，除了做專有名詞，也有兼做普通名詞、形容詞等等个意義，也有可能會予外儂聯想去䆀所在，親像有姓「烏 Oo」、「黑 Hik」，也有袂少用動物名做儂姓，像「馬、牛、熊、羊……」，即種姓攏有機會予儂供體。不而過，遮个專有名詞佮普通詞類个用法佮漢字，攏有長期流通、慣用个社會基礎佇咧，正常情形眾儂就袂去亂想。
但是台語 phun 漢字按怎寫，根本都無社會習用字做基礎。拄著即擺賣䊩油个大新聞，華文媒體提起〔餿水〕个台語，攏用注音符號「ㄆㄨㄣ」來表示，若有儂佇網路解說ㄆㄨㄣ个台語本字是「潘」，就有真濟儂回應講怹本來毋知。咱才拄開始咧建立台文標準爾爾，應該著趁即陣選用一个較四序、較無心理衝擊，會得減輕教學障礙个用字。
「䊩」對「潘」分化出來，已經便便佇遐規千年，字體个複雜度兩字差毋成物[tsiânn-mi̍h]，佇略仔較新个電腦系統欲顯示無問題、欲輸入也無困難，咱是按怎毋好好仔利用，來予社會大眾歡喜順趁？煞賭強欲復倒[ho̍k-tò]上古，寫仝一字「潘」，才來了工教示全社會遐个「狡怪」囡仔佮大儂，叫怹毋通uân話？
根據內政部戶政司民國96年出版【全國姓氏要覽】，全台灣姓「潘 Phuann」个儂數，佇 1542 个字姓內底，排佇第 31 位，有 156,558 儂，我身為潘--家後代，的確著為即十五、六萬名个宗親出頭來爭取合情合理个台語用字。
以上个意見發表佇 Facebook，得著真濟國小第一線个母語教師來贊聲，足感心。怹毋是姓潘，但是攏認同我个看法，同意目前台語課本 phun、Phuann 漢字無分，確實有造成潘姓學生予全班嘲笑[sau-tshiò]个大困擾。怹上課教到即个所在，心肝內攏真歹勢，毋知欲按怎講落去。
（以上欲投稿）
補充：
二次米䊩[jī-tshù bí-phun]是大好物，洗碗、洗菜、洗車、揉塗跤、沃花種菜、甚至美容洗浴攏會用得，對環保有大貢獻。
讀者个電腦若是看袂著「米+番」即字，就表示汝所用个電腦作業系統抑是上網个瀏覽器版本傷舊矣。有兩種解法：
1. 安裝新版个 Google Chrome 瀏覽器來上網。
2. 若閣袂使，就安裝「新細明體擴充套件」，來擴充汝个電腦字型。
若是 Windows 7 抑是閣較新个版本，欲顯示「䊩」完全免另外裝軟體。不過若是欲輸入，用台語輸入法，無論是教育部臺灣閩南輸入法，抑是信望愛台客語輸入法，攏有提供足方便个使用者加字功能，一開始用三分鐘做一遍工，以後就攏扑會出來矣。若是平常慣勢用微軟新注音輸入法，欲扑「䊩」即字，著愛裝新注音輸入法 2010 版，伊有「自訂漢字/字根」个功能，會使將「䊩 ㄈㄢˊ」加入去表內，以後扑 ㄈㄢˊ 就有「䊩」即字好選囉，下載佮功能畫面請參考：重灌狂人：[下載] 微軟新注音、新倉頡輸入法 2010＜/a>
2014-11-04 補充：
phun 佇出名个台語文獻《千金譜》有用著，漢字个寫法有幾種版本，像《居家必用千金譜歌》（光緒丁亥年1887年，出版者不明）寫做「洣」。「洣」本來是唸做 bí，意思是湖南省一條溪个名，借用來寫台語 phun 真有創意，通看做「䊩」个簡寫。若是較後手个《居家必用千金譜歌》（昭和七年1932年，捷發漢書部）就寫做「䊩」。可見即个「䊩」--字佇重要个民間文獻也有採用，毋但是學者考證出來个「象牙塔字」。請看附圖第一行第二字開始「䊩著多，湆著澇」（Phun tio̍h tsuē. Ám tio̍h lô.）：
Comments powered by Disqus.