文化局一樓後壁塊辦書展，有真儕中國出版社个冊，小部份是印繁體字。看著上海古籍出版社、中華書局即兩間出上儕繁體字个冊。前者(cian5--cia2)有仿古冊，出一套真儕部(pho7)个「巾箱本」線裝書，版式ciau5細个仔，無用硬殼个書函，干那用一沿軟紙踅(seh8)一輾(lian3)封起來，愛對天地頭將內底个冊抽出來，真歹giu2。伊个所見奇(soo2-kian3-ki5)是用雙色印刷，本文用烏字，小字註解、眉批(bi5-phue1)用紅色抑是青色。雖然字卡細字，毋閣因為是重排版个，看會清。
我心內塊向望講無的確有《十八家詩鈔》，相相(siong3)咧，無。
另有嘛有台灣个出版社，我有買一本《台灣古建築鑑賞二十講》，李乾朗著，藝術家出版。內底有阮屏東萬丹媽祖廟个介紹、相片。迄間廟著佇阮店chuah8對面，細漢定定去拜拜，佇廟前廟後塊走，佇石獅頂peh4峘peh4落塊chit4-tho5，卜共伊喙內个石球gim5出來，sian1 gim5都無法度。毋閣我從來都毋捌寶，毋知影即間廟是足罕見个「對場作」(tui3-tiunn5-coh4？)个宮廟建築(king1-bio7-kian3-tiok8)，讀研究所以後才知。後來轉去看个時陣，已經塊改建矣。翻好變新廟，倒怯勢(to3- khiap4-si3)，閣趁儂時行，做一个藻井(co2-cinn2)。對面是萬丹國小，全部拆掉重起。我讀个幼稚園，出名个萬丹大好額儂李丈義个大厝嘛歸个拆掉起販厝。我細漢个記持(ki3-ti5)佇我後半世儂隱囥(un2-khng3)佇心肝底，消失佇現實个世間。
文化局圖書館个《十八家詩鈔》是商務影印个另外一个古早版，字縮細、有異文無註解。
佇參考室看著一部我毋知个《李氏台語辭典》，李春祥先生遺著(ui5-tu3)，2001年姻公子李豐明自費出版。可敬、可憐个台灣前輩、先賢！
閣看著一部《中國方言謠諺全集》，收集古早儂个冊，蔣致遠編，中和市宗青出版。其中一本是《通俗常言疏證》(soo3-cing3)。袂 bai2，會凍知影官語幾百年來所累積个一寡成語、俗語个來源。嘛會使共吸收來予台語用，另外閣會使提這來做對照集。一條一條想看、揣看台語本底咁有相應个表達法。
官話所累積个文學作品是驚死儂儕。明朝頭个《水滸傳》伊个語言運用，毋知台語愛按怎才佮伊有比並(pi2-phing7)。
Comments powered by Disqus.