相片是「石車 tsio̍h-tshia」个模型，一張[tiunn]石車，起碼愛有兩粒石車lián，簡稱石lián。用牛拖動石車，予石lián 一直轉[tńg]，伊个齒就會「硤[kheh/khueh]甘蔗」，流出來个甘蔗汁通做糖。邊=仔另外有煮糖个所在，規个工場叫做「糖廍 thn̂g-phōo」，抑是「蔗廍 tsià-phōo」。
石車重khuâinn-khuâinn，用兩隻牛拖是上起碼个。內爿迄隻叫做「內牪 lāi-kânn、內牪牛 lāi-kânn-gû」，外爿叫做「外牪 guā-kânn、外牪牛 guā-kânn-gû」。兩隻一組叫做「牛牪 gû-kânn」，若是幾若隻一組叫做「牛掛 gû-kuà」。管理、指揮牛个儂，雖然攏派查埔儂工，卻是號做「牛婆 gû-pô」。
俗語「用鴨卵 屧[siap]石車」，意思是用鴨卵來窒[that]石車下底个縫予石車較在、較穩，類似「螳臂擋車」个比喻意思。
目前台灣各地閣有袂少庄頭个名有「廍」--字在內，彼古早攏是有蔗廍个所在。像嘉義中埔、屏東萬丹攏有「興化廍」，是福建興化儂个庄頭，而且有開蔗廍。「興化廍」阮萬丹儂早就變音唸做 hing-ánn-phōo，但是漢字猶原寫「興化廍」。
後來日本儂才設「機器廍 ki-khì-phōo」，用蒸汽機做動力。閣來就是「製糖會社 tsè-thn̂g-huē-siā、糖廠 thn̂g-tshiúnn」，規模愈大。
但是後藤新平1905年定出「採收區域制度」推行對日本統治者有利个糖業政策了後，糖廠毋但強收台灣地主个土地，也剝削廣大个蔗農，毋但收買價格傷低，連磅甘蔗个時，也定定共農民斂稱頭[liám tshìn-thâu]，毋才有俗語講：「第一戇[gōng]，種甘蔗予會社磅[pōng]」，引起農民抗爭運動。
中國黨走路來台灣，劫收糖廠一望無際个大片土地，國庫通黨庫，不公不義个黨產佮個別黨員个私利，有濟濟攏是對糖廠來个，到今台糖閣一直咧賣糖廠地予建商炒地皮，也破壞古蹟佮生態，證明台灣猶原是外來政權咧殖民啦！
多謝鄭文海老師分享相片。
Comments powered by Disqus.