台灣囡仔〔猜拳〕个古早耍法佮講法

〈台灣囡仔〔猜拳〕个古早耍法佮講法〉作者：潘科元

囡仔咧耍，決定順序，著愛〔猜拳〕：鉸刀、石頭仔、紙，這台語叫做 giāng（也有講 jiāng, liāng），完整个講法是 jia̋ng-kián，這是對日語來个。若按呢，日本時代以前个古早台灣儂按怎講、按怎比？有一種叫做「㖅土地 su̍t thóo-tī」，su̍t 是動詞。日本時代以後講「咱來 giāng 看啥儂先」，古早講「咱來 su̍t 看啥儂先」，出五支指頭仔其中一支，分別來比輸贏。

五支指頭仔个台語名稱非常濟講法，尤其是第一支大頭拇，以下只講一種：

1. 第一支是「大頭拇」，佇遮號做「土地公」，地位上懸个，予伊做第一支。
2. 第二支是「指指 kí-tsáinn」，號做「雞」，kí-tsáinn 指物件，親像雞喙啄米。
3. 第三支是「中指 tiong-tsáinn」，號做「虎」，體型上大，用第三支代表。
4. 第四支是「尾二指 bué-jī-tsáinn」，號做「佬仔 láu-á」，就是騙子个意思，所以尾二指也叫做「佬仔指 láu-á-tsáinn」，即支嘛有號做「賊仔」。尾二指也叫做「䆀指」，佬仔是歹儂，歹儂配䆀指，有合。
5. 第五支是「尾指 bué-tsáinn」，號做「白蟻 pe̍h-hiā」，形體上細，所以用尾指表示。

規則是：

1. 第一支 土地公 贏 雞、虎，輸 佬仔、白蟻。1 贏 2, 3，輸 4, 5。
2. 第二支 雞 贏 白蟻，輸土地公、虎、佬仔。2 贏 5，輸 1, 3, 4。
3. 第三支 虎 贏 雞、佬仔，輸 土地公、白蟻。3 贏 2, 4，輸 1, 5。
4. 第四支 佬仔 贏 土地公、雞、白蟻，輸 虎。4 贏 1, 2, 5，輸 3。
5. 第五支 白蟻 贏 土地公、虎，輸 雞、佬仔。5 贏 1, 3，輸 2, 4。

以下我試來解說其中个道理：

俗語講「得失土地公，飼無雞」，閣有虎爺是土地公个跤力[kha-li̍k]，雞佮虎攏予土地公管，所以土地公贏雞、虎。但是佬仔會偷走土地公神像，白蟻會蛀歹土地公神像，所以土地公輸佬仔、白蟻。

雞會食白蟻，所以雞贏白蟻，但是土地公管雞、虎食雞、佬仔偷掠雞，所以雞驚即三項。

虎雖然歹閣大隻，會食儂、食雞，但是驚白蟻 鑽跤蹄共伊蹧躂。「佬仔、賊仔」定定挖空peh壁，做歹代誌，所以有才調對付白蟻。

最後，五支指頭仔比輸贏，是按怎有个贏 2 輸 2，有个贏 1 輸 3，有个贏 3 輸 1，咁毋是無公平？

照我个解說，這牽涉著咱儂手指仔个靈活度。古早台灣儂可能是將指頭仔个靈活度分做三級：

1. 第一級 上活動个，是第二支 指指，真好比，也上捷用來指東指西，毋才叫做「kí-tsáinn」，所以囡仔會定定出，定定出个指頭仔，就愛予伊輸濟 贏少。
2. 第二級，就是 大頭拇、中指、尾指，即三支攏贏 2 輸 2。
3. 第三級，活動性上差个是尾二指，歹比，著予伊贏 3 輸 1。

各位看咱台灣儂祖先，頭腦有夠好。「㖅土地」予外來个物件取代了後，毋但咱个頭腦變簡單，連手指頭仔嘛硬掙[ngē-tsiānn]去啦！

收話尾：㖅土地个規則，我有參考《台灣風俗誌》、《日臺新辭書》，閣有蕭藤村老師个講法，三種版本有出入。我感覺蕭老師講个，予我有法度做上合理个解說，所以採用伊个，佇遮共伊說謝。