有儂主張台語外來語咧寫台羅个時免標聲調，這是無完整个簡寫法，毋是正範个做法。聲調是咱語言个重要成分，準做外來語个外語源頭本身是無聲調个語言，伊一旦用咱个音韻系統去調整過，變做咱个外來語了後，就成為咱台語辭彙个一部份，伊就是有聲調个，若唸無仝聲調，別儂會聽無，上無也會感覺足好笑。
親像機車講做 oo-tóo-bái，若是無標聲調，寫做 oo-too-bai，按呢將來个囡仔自修台語，看著即个詞，伊哪知影愛按怎唸較著？oo-too-bai？oo-tóo-bai？őo-too-bai？őo-too-bái？攏總毋著！
雖然來自日語个三音節台語外來語，大部份攏呈現出「中平-高平-高降」个實調組合，像頂面个 oo-tóo-bái，閣有 su-pán-ná（扳手）、me-lí-á（合枋），但是 khòng-ku-lí（有儂唸 khōng-ku-lí）就毋是，若唸做 khong-kú-lí 就予儂聽著足歹接受。按呢遮个三音節外來語，若一律無標調，哪會用得？
Mài講遐个囡仔，最近有一份台語个工程術語，本來是用「火星文」來記錄伊个台語音，有朋友欲招台語文界个眾先進來共伊用台羅精確改寫，設使若無記聲調，連我來學都會非常痛苦，因為真濟所在判斷袂出來儂實際个聲調到底是按怎唸个？咱若聲調學無到角，講出來予內行儂聽著，輕--者，伊會感覺足礙虐，笑咱是外行儂，重--者，伊會反應袂過來，聽無。
閣像最近我咧討論个：a-sáng 是對外口个中年婦女親切个敬稱（有時是指中年男性），但是 a-sàng 是一寡儂對怹老爸个稱呼。即兩个詞當然是外來語（a-sáng 來自 おばさん抑是おじさん；a-sàng 來自おとうさん），若無標聲調，只寫 a-sang，按呢是欲按怎讀、按怎分啦？
一、「外來語」毋是「外語」。
二、外來語無所謂本調、變調，並無表示外來語無聲調。
即兩个觀念，現時真濟台語文界个儂實在無了解。
若根據「外來語無所謂本調、變調」个觀點，來反對寫做 oo-tóo-bái，至少也著設計一種「看著記第幾調就直接唸第幾調」个音節分隔號，親像寫做 ōo’too’bái 抑是 ōo·too·bái。
用 apostrophe 來做分隔號个好處是扑字盤直接扑會出（佇 Enter/return 齒个倒手爿第一齒），但是看著較無清爽；用 middle dot (Unicode 編號 U+00B7) 个好處是較清爽，但是扑字盤無符號通直接扑出來。
Comments powered by Disqus.